लेखनाथ, कात्तिक २६ गते । नेकपा (माओवादी केन्द्र) का उपाध्यक्ष नारायणकाजी श्रेष्ठले आगामी मङ्सिर ४ गतेको निर्वाचन संविधानको रक्षा र शान्ति प्रक्रिया टुङ्गोमा पुर्याउनका लागि भएको बताउनुभएको छ ।
पाँचदलीय गठबन्धन चुनाव प्रचार–प्रसार समिति कास्कीद्वारा शनिबार आयोजित निर्वाचन केन्द्रित छलफल कार्यक्रममा नेता श्रेष्ठले मङ्सिर ४ गते हुने प्रतिनिधिसभा र प्रदेशसभा सदस्यको निर्वाचन लोकतन्त्रको सामान्य प्रक्रिया मात्र नभएको उल्लेख गर्नुभयो ।
“बाह्रबुँदे सम्झौताअनुसार बेपत्ता र द्वन्द्वपीडितले अझैसम्म क्षतिपूर्ति पाउन सकेका छैनन्, उहाँहरूको माग सम्बोधन गर्नुपर्छ”, उहाँले भन्नुभयो, “पाँच दलीय गठबन्धन निर्वाचन पछिसम्म पनि रहनेछ ।”
शान्ति, समृद्धि र लोकतन्त्रको पक्षमा पाँचदलीय गठबन्धन रहेको उल्लेख गर्दै उपाध्यक्ष श्रेष्ठले निर्वाचनपछि बन्ने पाँचदलीय गठबन्धनको सरकारले विगतका गल्ती कमजोरी सच्याउँदै अगाडि बढ्नुपर्ने बताउनुभयो । लोकतन्त्रको अभिन्न अङ्ग निर्वाचन भएकाले सबै नेपाली यसमा होमिएका उहाँको भनाइ थियो ।
नेपाली कांग्रेसका केन्द्रीय सदस्य नैनसिंह महरले स्थानीय निर्वाचन सफलतापूर्वक सम्पन्न गरेको वर्तमान सरकारले प्रतिनिधिसभा र प्रदेशसभा निर्वाचन पनि सफलरूपमा सम्पन्न गर्न अगाडि बढेको बताउनुभयो । पाँचदलीय गठबन्धन निर्वाचन पछिसम्म पनि कायमै रहने उहाँको भनाइ थियो ।
लोकतन्त्र र संविधानको रक्षा, समृद्धि र स्थिर सरकारको निम्ति पाँचदलीय गठबन्धन एउटै पार्टी जस्तै बनेकाले गठबन्धनमा आबद्ध सबै दलले आफ्ना साझा उम्मेदवारलाई मतदान गर्नसमेत महरले आग्रह गर्नुभयो ।
नेकपा (एकीकृत समाजवादी) कास्कीका उपाध्यक्ष पूर्ण लामाले आगामी निर्वाचनमा अधिकांश स्थानमा गठबन्धनका उम्मेदवार विजयी हुने भएकाले देशलाई समृद्धितर्फ कसरी अगाडि बढाउने भन्नेबारेमा सोच्न जरुरी भएको बताउनुभयो । उहाँले कास्कीमा प्रतिनिधिसभा तथा प्रदेशसभाका नौ वटै सिटमा गठबन्धनका उम्मेदवार विजय हुने दाबी गर्नुभयो ।
नेपाली काँग्रेस कास्कीका कार्यवाहक सभापति रामबाबु भण्डारीको अध्यक्षतामा भएको उक्त कार्यक्रममा कांग्रेसका युवा नेता गङ्गा धर पराजुलीलगायतले आफ्नो विचार व्यक्त गरेका थिए । रासस
-square-thumb.jpg)
