भारतको लगातार दोस्रो जित

काठमाडौं, कात्तिक १० गते । भारतले आइसिसी टी-२० विश्वकप क्रिकेटको सुपर १२ मा लगातार दोस्रो जित निकालेको छ ।  सिड्नी क्रिकेट मैदानमा बिहीबार भएको खेलमा भारतले नेदरल्यान्ड्सलाई ५७ रनले हरायो । 

जितको लागि एक सय ८० रनको लक्ष्य पछ्याएको नेदरल्यान्ड्सले निर्धारित २० ओभरमा नौ विकेटको क्षतिमा एक सय २३  रन बनायो । नेदरल्यान्ड्सका लनगि टिम प्रिन्गलले सर्वाधिक २० रन बनाउनुभयो ।

कोलिन एकरम्यानले १७, म्याक्स ओडाउड र बास डी लिडेले समान १६/१६, शरिज अहमदले अविजित १५ र भान मार्केनले १४ रन बनाउनुभयो ।

बलिङमा भारतका रविचन्द्रन आश्विन, अर्शदीप सिंह, अक्षर पटेल र भुवनेश्वर कुमारले दुई दुई तथा मोहम्मद सामीले एक विकेट लिनुभयो । 

यसअघि टस जितेर पहिले ब्याटिङ गरेको भारतले निर्धारित २० ओभरमा दुई विकेटको क्षतिमा एक सय ७९ रन बनाएको थियो । भारतका लागि विराट कोहलीले अविजित ६२ रन बनाउनुभयो ।

कप्तान रोहित शर्माले ५३ र सूर्यकुमार यादवले अविजित ५१ रन बनाउनुभयो । नेदरल्यान्ड्सका पाउल भान मार्केन र फर्द क्लासेनले एक एक विकेट लिनुभयो ।

लगातार दोस्रो जितसँगै भारत समूह बी मा चार अङ्कसहित शीर्षस्थानमा उक्लिएको छ । पहिलो खेलमा भारतले पाकिस्तानलाई हराएको थियो । पराजित नेदरल्यान्ड्स अङ्कविहीन बन्दै अन्तिममा छ । एजेन्सी