अर्जुन काफ्ले
स्याङ्जा, असोज २९ गते । नवौं राष्ट्रिय खेलकुदको पुरुष भलिबलमा पुलिस क्लब क्वार्टर फाइनलमा प्रवेश गरेको छ । समूहमा रहेको ‘ए’ को पुलिस लगातार दुई जित निकाल्दै समूह विजेता समेत बनेको छ ।
पुलिसले लुम्बिनी प्रदेशलाई २५–१२, २५–८,२५–२१ को सेटमा हरायो । क्वार्टरफाइनलमा पुलिसले समूह ‘सी’ को उपविजेतासँग खेल्नेछ । शनिबार नै भएको अर्को खेलमा विभागीय टोली एपीएफ र त्रिभुवन आर्मी क्लबले पनि पहिलो जित निकालेका छन् ।
एपीएफले गैर आवासीय नेपाली संघ (एनआरएनए) लाई ३–० को सोझो सेटमा हरायो । एपीएफले २५–१९, २५–१५, २५–१३ को जित निकालेको थियो । आर्मीले प्रदेश १ लाई ३–० को सोझो सेटमा हरायो । आर्मीले २५–१२, २५–१९, २५–२३ जित निकालेको हो । पुरुष भलिबलमा चार समूहमा ११ टिम सहभागी छन् ।
