रिङ रेस्लिङमा किङ रोबर्ट पहिलो

काठमाडौं, असोज १५ गते । किङ रोबर्ट “बडा दशैं महाभिडन्त” रिङ रेस्लिङ प्रतियोगिताको हेभी वेटमा शनिबार च्याम्पियन बन्नुभएकोे छ । उहाँले नुवाकोटे टाइगरलाई पराजित गर्नुभएको हो । उपाधिसँगै रोबर्टले एक लाख ५० हजार रुपियाँ पुरस्कार पाउनुभयो । 

नेपाल रिङ रेस्लिङ संघ, नुवाकोट जिल्लाको आयोजनामा भएको प्रतियोगिताको महिलामा तनुले आकृतिलाई हराउदै ६५ हजार रुपियाँ पुरस्कार पाउनुभयो । लाइट वेटमा सीजे वल्र्डले सुजलाई पाखा लगाउदै ५५ हजार रुपियाँ प्राप्त गर्नुभयो । 

नुवाकोटको गुर्जेस्थित कालिका माविको प्राङ्गणमा भएको प्रतियोगिताको ट्याग टिममा स्पाइडरम्यान र बाका जोडीले टुप्पी ग्याङलाई पन्छाउनुभयो । विजेतालाई ८५ हजार रुपियाँ पुरस्कार प्रदान गरियो । 

ट्रिपल थ्रेट म्याचमा चट्टानले डेभिडको चुनौती समाप्तपार्नुभयो । चट्टानले ७५ हजार रुपियाँ पुरस्कार पाउनुभयो । विजेतालाई पूर्व मन्त्री हितमान तामाङ, नेपाल रिङ रेस्लिङ संघकी महासचिव सुवर्ण श्रेष्ठलगायतले पुरस्कार प्रदान गर्नुभयो । यसअघि प्रतियोगिताको पूर्व उपप्रधानमन्त्री ईश्वर पोखरेलले उद्घाटन गर्नुभएको थियो ।