काठमाडौं, असोज १३ गते । साबा महिला बास्केटबल च्याम्पियनसिपमा नेपाल दोस्रो भएको छ । मालदिभ्समा बुधबार राति भएको खेलमा श्रीलङ्काले मालदिभ्सलाई ७२-५९ ले हराउँदै च्याम्पियन बनेपछि नेपाल दोस्रो भएको हो ।
बुधबार नै भएको खेलमा नेपालले भुटानलाई ६५-२६ ले हराउँदै उपाधि होड कायम राखेको थियो । मालदिभ्सलाई हराएसँगै श्रीलङ्का शीर्ष स्थानमा रहँदै च्याम्पियन बनेको हो । यसअघिल्लो संस्करणमा पनि नेपाल उपविजेता बनेको थियो । च्याम्पियनसिपको पहिलो खेलमा नेपाल मालदिभ्ससँग ५१–४७ अङ्कले पराजित भएको थियो ।
त्यही हार नेपालको उपाधि यात्रामा बाधक बन्यो । दोस्रो खेलमा नेपालले श्रीलङ्कालाई ५५–४९ अङ्कले हराएको थियो । च्याम्पियनसिपमा नेपाल, आयोजम माल्दिभ्स, श्रीलङ्का र भुटानले भाग लिएका थिए ।
