गजेन्द्र गुरुङ
खजुरा, वैशाख २२ गते । दोस्रो नेपालगन्ज १० के म्युजिक नाइट रनमा एक्सट्रिम इनर्जीले इनर्जी पार्टनरका रुपमा सहकार्य गरेको छ । यही वैशाख २५ गते राति ८ बजे हुने म्युजिक नाइट रन संगीत र दौडमार्फत समाजलाई एकतामा बाँध्ने र सहरलाई चलायमान गराउने अभियान रहेको रेस डाइरेक्टर चन्द्रबहादुर गुरुङले बताउनुभयो ।
नेपालगन्ज १० के नाइट रन विश्व रनिङको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस (एम्स) को पूर्णकालीन सदस्य हो । नाइट रन पनि एम्स प्रमाणीकरण रुटमा सञ्चालन हुने रेस डाइरेक्टर गुरुङले बताउनुभयो ।
नेपालगन्ज उपमहानगरपालिका गेटबाट सुरु भइ राँझाचोक पुगेर पुनः सोही रुट हुँदै वीपीचोकमा सम्पन्न हुने दौड अवधिभर सांगीतिक कार्यक्रम सञ्चालन गरिने जनाइएको छ । एम्समा आबद्ध दुईवटा रेस सञ्चालन हुने नेपालगन्ज नेपालमा एक मात्र सहर हो ।
नाइट रनमा १० किमी खुला पुरुष र महिला तथा ५ किमी स्कुलस्तरीय छात्र एवम् छात्रा विधामा स्पर्धा समावेश गरिएको छ । गत संस्करणमा नेपाली सेनाका मुकेश पाल र नरैनापुर (बाँके) की गीताकुमारी साहु विजेता बन्नुभएको थियो ।
नेपालगन्ज १० के म्युजिक नाइट रन नेपालको पहिलो रात्रि दौड हो । स्वस्थ, सभ्य र सुरक्षित सहरको परिचय स्थापित गर्न नाइट रन सुरु गरिएको आयोजकले जनाएको छ ।
यसपटक स्थानीयस्तरमा राम्रो प्रदर्शन गर्ने धावकलाई वल्र्ड एथलेटिक्सबाट मान्यताप्राप्त दक्षिण एशियाली र एशियाली मुलुकमा हुने आधिकारिक रेसमा सहभागी गराउने तयारी गरिएको आयोजक रेस नेपालका कोषाध्यक्ष सुमन बस्नेतले जानकारी दिनुभयो ।
धारा नेपालगन्ज म्याराथनले थाइल्यान्ड मलेसिया सिंगापुर भुटान बंगलादेशलगायत देशमा धावक सहभागी गराउने तयारी गरिरहेको जनाएको छ ।
-original-thumb.jpg)
