म यतिखेर
मेरो माटोको इतिहास खोजिरहेछु
पुर्खाका पसिनाले भिजेका भोटाहरू
दापसहित रक्तरञ्जित खुकुरी, खुँडा र तरबारहरू
पुर्खाले टेकेका पाइतालाको डाम
र देउरालीमा चढाएका निसान ध्वजापताकाहरू हेरिरहेछु
पुर्खाका दुःखले अर्जेको यो माटोको इतिहास पढिरहेछु ।
देशका लागि भोकभोकै भिडेको कथा
पानीबिना प्यास प्यासै लडेका कैयौँ युद्धहरू
साहस, बलिदान र त्यागका कथा पढिरहेछु ।
म नियालेर हेर्दैछु
वर्तमानका असरल्ल छरिएका नक्साहरू र
सिमाना मिचिएका केरमेट स्वरूपहरू
म तुलना गर्दैछु इतिहासका पन्नाहरू
शत्रुलाई हराएर कोरिएको नक्सा र सिमाना
अनि वीरताको इतिहास सम्झिरहेछु ।
म गर्वसाथ भन्न सक्छु
माटोसँग गाँसिएको छ हाम्रो जीवनको रङ्ग
माटोसँग मिसिएको छ हाम्रो इतिहास र वर्तमान
माटोमै कोरिएको छ हाम्रो परिचय र अस्मिताको आकाश ।
हो, पक्कै हो
अस्मिता–माटोसँगको सबन्ध रहेछ
परिचय–माटोमा कोरिएको इतिहास रहेछ
इतिहासको सम्मान नगर्नेहरू र
माटोको माया नहुनेहरू
देशद्रोहीभन्दा फरक नपर्ने रहेछ ।
म यतिखेर
मेरो माटोको इतिहास खोजिरहेछु
मेरा पुर्खाले कोरेका नक्साहरू र
स्थापित गरेका सिमानाका चौकिल्लाहरू खोज्दैछु
अनि मेरा पुर्खाको इतिहास र वीरताको गाथा पढिरहेछु ।
नरेफाँट, काठमाडौँ
