काठमाडौँ, चैत २७ गते । सरकारले मध्यपूर्वका विभिन्न देशका विमानस्थलमा कुनै पनि नेपाली नागरिक अलपत्र अवस्थामा नरहेको प्रष्ट पारेको छ । शुक्रबार सिंहदरबारमा आयोजित पत्रकार सम्मेलनमा परराष्ट्र मन्त्रालयका प्रवक्ता लोकबहादुर पौडेल क्षेत्रीले सो कुराको जानकारी दिनुभएको हो ।
प्रवक्ता पौडेलले त्यस क्षेत्रमा उत्पन्न तनावका कारण स्वदेश फर्कन चाहने नेपालीका लागि सरकारले हवाई उडानको आवश्यक व्यवस्था मिलाएको बताउनुभयो । मन्त्रालयका अनुसार सो क्षेत्रबाट स्वदेश फर्कन चाहनेहरू कतै पनि अप्ठ्यारोमा परेका छैनन् । नेपाल आउन चाहने नेपालीलाई नेपाल एयरलाइन्स, हिमालय एयरलाइन्स लगायतका विमानबाट स्वदेश फर्काउने काम भइरहेकाले कुनै समस्या देखिएमा पनि त्यसको तत्काल समाधान हुने परराष्ट्र मन्त्रालयको दाबी छ ।
प्रवक्ता पौडेलले भन्नुभयो, “अहिले पश्चिम एसिया क्षेत्रमा कहीँ पनि नेपाली नागरिक ट्रान्जिटमा रहनुभएको भन्ने जानकारी छैन । हाम्रा दूतावास, नियोगहरू र हटलाइन प्रणालीको पछिल्लो तथ्याङ्क हेर्दा त्यस्तो अवस्था देखिएको छैन । हवाई आकाश खुलेसँगै नेपाल आउन चाहनेहरूका लागि सहज वातावरण सिर्जना भएको छ ।”
उहाँले माननीय परराष्ट्र मन्त्रीको पहलमा नेपाली हवाई सेवा प्रदायकसँगको समन्वयमा उडान सुरु भइसकेकाले देखिएका सामान्य समस्या पनि छिट्टै समाधान हुँदै जाने बताउनुभयो । स्वदेश फर्कन चाहने नेपालीको हवाई उडानमा सहजीकरण गर्न सरकारले विशेष पहल गरिरहेको मन्त्रालयले जनाएको छ ।
