विभेदविरुद्व बोल्ने प्रण लिएकी छु : स्वर्णकार

लक्ष्मी तिमिल्सेना

जमुनाह, चैत २३ गते । राष्ट्रिय स्वतन्त्र पार्टी (रास्वपा)बाट समानुपातिक सांसद रहनुभएकी ४३ वर्षीया सुष्मा स्वर्णकार ‘डिम्पल’ ले विभेदविरुद्ध संसद् बैठकमा आवाज उठाउने प्रण गर्नुभएको छ । 

एक छोरा एक छोरी गरी दुई सन्तान हुर्काउँदै सुष्मा आफू भारतमा जन्मनुभयो । ८ वर्षको उमेरमा उहाँ सपरिवार नेपाल फर्कनुभयो । १८ वर्षको उमेरमा उहाँको विवाह भयो । 

श्रीमानको मूलघर सल्यान भए पनि बसाइसराइ गरेर बाँके आउनुभयो । २०५८ सालदेखि काठमाडौँमा कर्मथलो बनाइरहनुभएकी सुष्माको नेपालगन्ज र काठमाडौँ दुबैतर्फ बसोवास छ । बाँकेको कोहलपुर नगरपालिका–५ मा मूल घर भए पनि छोराछोरी पढाउन सुष्माको परिवार काठमाडौँ पुग्यो । 

परिवार र छोराछोरीबिच उहाँको जीवन घुमीरहन्थ्यो । उहाँ गृहणी हुँदै सामाजिक अभियानमार्फत राजनीतिमा प्रवेश गर्नुभयो । ‘दलितलाई खै ?’ भन्ने अभियानबाट उहाँ दलित अभियन्ताको रूपमा अगाडि बढ्नुभएको थियो । उहाँले भन्नुभयो, ‘पहिला छोराछोरी सानै थिए परिवारको जिम्मेवारीले बाहिर आउने अवस्था थिएन । अहिले छोराछोरी ठुला भइसके ।”

दलित अधिकारको अभियानमा सक्रिय रहँदै आउनुभएका स्वर्णकारले माध्यमिक तहसम्म अध्ययन गर्नुभएको छ ।

अब भने उहाँ कानुन निर्माण गर्ने थलो संसदमा पुग्नुभएको छ । यसले उहाँलाई राष्ट्रिय राजनीतिक मञ्चमा सहभागी हुने अवसर दिएको उहाँको बुझाइ छ । आफू दलित समुदायबाट प्रतिनिधित्व गर्ने भएकाले दलित र सिमान्तकृतका अधिकारको पैरवी गर्ने उहाँको भनाइ छ । ‘दलित अधिकारको क्षेत्रमा र विशेषगरी दलित महिलाको अधिकारका क्षेत्रमा आवाज उठाउने छु’ उहाँले भन्नुभयो ।

राजनीति आफ्नो पहिलो रोजाइ कहिल्यै नरहेको उहाँले बताउनुभयो । उहाँले भन्नुभयो, ‘मेरो इच्छा सक्रिय राजनीतिमा आउने कहिल्यै थिएन । समयको आवश्यकताले मलाई अभियन्ताबाट सासंदको भूमिकामा ल्याइ पुर्‍याएको छ । हरेक परिवर्तन राजनीतिबाट मात्र सम्भव छ र त्यो हाम्रै पालामा हुनुपर्छ भन्ने लागेर राजनीतिमा प्रवेश गरेकी हुँ ।’ 

विभेद र अभावलाई नजिकबाट नियाल्नुभएकी र आफैले भोग्नु भएकी सुष्माले विभेदविरुद्व बोल्ने प्रण लिएको बताउनुभयो । उहाँको पति चक्रमान विश्वकर्मा पनि दलित अधिकर्मी हुनुहुन्छ ।