बिकास अधिकारी
पश्चिम नवलपरासी, चैत ३ गते । पश्चिम नवलपरासीमा आर्थिक गणना कार्यालय स्थापना गरिएको छ । वैशाख दुईदेखि असार ७ गतेसम्म हुने गणनाका लागि परासीमा साविकको करदाता सेवा कार्यालय रहेको भवनमा कार्यालय स्थापना गरिएको हो ।
जिल्ला समन्वय समितिका प्रमुख भगौती यादव, प्रमुख जिल्ला अधिकारी दिपकराज नेपाल, प्रमुख कोष नियन्त्रक कमल सापकोटा लगायत सरोकारवालाको उपस्थितिमा कार्यालय स्थापना गरिएको हो ।
कार्यालयमार्फत चैत महिनाभर गणनाको आवश्यक तयारी गरिने छ । जिल्लामा आर्थिक गणनाका लागि ४८ गणक र ८ सुपरीवेक्षक खटिने छ । चैत मसान्तसम्म गणकको नियुक्ति, गणकहरूलाई तालिम प्रदान र पालिका तहमा सरोकारवालाबिच छलफल सकेर गणना सुरु गरिने आर्थिक गणना अधिकारी यज्ञमूर्ति भण्डारीले जानकारी दिनुभयो ।
जिल्लामा आर्थिक गणना सम्पन्न गर्न प्रमुख जिल्ला अधिकारीको संयोजकत्वमा जिल्ला जनगणना समन्वय समिति हुन्छ । पालिका तहमा स्थानीय तह समन्वय समिति र वडा स्तरमा वडास्तरीय सहजिकरण समिति पनि गठन गरिने छ ।
‘अर्थतन्त्र मापनका लागि आर्थिक गणना’ भन्ने मुल नारासहित चालु आर्थिक वर्ष भित्र सम्पन्न हुने गरी देशैभर दोस्रो पटक आर्थिक गणना गर्न लागिएको छ । २०७५ सालको वैशाखमा पहिलो पटक आर्थिक गणना भएको थियो । यस गणनाका दौरान आर्थिक क्षेत्रका १८ वटा क्षेत्रको आधारभूत विवरण सङ्कलन गरिने छ । जसमा देशैभर रहेका दर्ता भए, नभएका ठुला साना, व्यापार÷प्रतिष्ठान, रोजगारीका हिसाबले धेरै रोजगारी दिएका वा स्वरोजगार प्रतिष्ठानको तथ्याङ्क सङ्कलन गरिने छ ।
