फेवा किनारका अवैध संरचना हटाउन अल्टिमेटम

फडिन्द्र अधिकारी

लेखनाथ, फागुन ६ गते । पोखरा महानगरपालिकाले फेवातालको मापदण्ड र सडक सीमा मिचेर बनाइएका अवैध संरचना हटाउन १५ दिने अल्टिमेटम दिएको छ । महानगरले वडा १८ को खपौँदी र रातोडाँडा क्षेत्रमा बिना अनुमति निर्माण गरिएका रेस्टुरेन्ट र क्याफेहरूलाई पत्राचार गर्दै संरचना आफैँ हटाउन निर्देशन दिएको हो ।

महानगरले बुधबार लेजी बी रेस्टुरेन्ट, क्यालिफोर्निया गार्डेन र कफी सपलाई छुट्टाछुट्टै पत्र काट्दै अवैध संरचना हटाउन भनेको छ । फेवातालको ‘ताल घर’ सीमाङ्कन भइसकेपछि निर्माण भएका संरचनाहरू हटाउने कार्य सुरु भइसकेको महानगरले जनाएको छ । सीमाङ्कन हुनुभन्दा अगाडि बनेका संरचनाको हकमा भने नियमानुसार प्रक्रिया अघि बढाइने महानगरले जनाएको छ ।

खपौँदीस्थित लेजी बी रेस्टुरेन्ट र क्यालिफोर्निया गार्डेनले फेवातालको ‘ताल घर’भित्र पर्ने गरी अवैध संरचना निर्माण गरेका छन् । यी संरचना हटाउन यसअघि पटक–पटक मौखिक जानकारी दिँदा र निर्माण सामग्री नियन्त्रणमा लिँदा समेत अटेर गरी काम अघि बढाइएको महानगरको दाबी छ ।

यस्तै, रातोडाँडास्थित कफी सपले सडक मापदण्डभित्र र सडक दुर्घटना हुने गरी संरचना बनाएको छ । महानगरका निमित्त प्रमुख प्रशासकीय अधिकृत हेमप्रसाद आचार्यले हस्ताक्षर गरेको पत्रमा १५ दिनभित्र संरचना नहटाए स्थानीय सरकार सञ्चालन ऐन २०७४ अनुसार महानगर आफैँले भत्काउने चेतावनी दिइएको छ । 

त्यसरी महानगरले संरचना हटाउँदा लाग्ने सम्पूर्ण खर्च समेत सम्बन्धित व्यक्तिबाटै असुल उपर गरिने उहाँको भनाइ छ । महानगरले यो जानकारी जिल्ला प्रशासन कार्यालय, जिल्ला प्रहरी कार्यालय र वडा प्रहरी कार्यालय बैदामलाई बोधार्थ पठाइसकेको छ । 

सोमबार महानगरले वडा नम्बर १८ स्थित सेदी र रातोमाटो डाँडामा अनुमति बिना बनाउँदै गरेका दुई संरचना भत्काएको थियो । रातोडाँडामा बन्दै गरेको किशोर दाहालको भवन र सेदीमा बन्दै गरेको सुशील गुरुङको भवन महानगरले भत्काएको थियो । 

सर्वाेच्चको आदेश बमोजिम फेवातालको सीमाङ्कन गर्न पोल गाडिसकेको महानगरले अब तालको क्षेत्रमा बनेका संरचना हटाउने जनाएको छ । महानगरका सूचना अधिकारी कृष्णप्रसाद तिवारीले चाँडै तालाघरका सबै संरचना हटाइने उल्लेख गर्नुभयो । “चाँडै तालघरमा बनेका संरचना आफैं हटाउन सूचना जारी हुन्छ,” उहाँले भन्नुभयो, “आफैं नहटाए महानगरले हटाउँछ र लागेको खर्च पनि उहाँहरूबाटै असुल गरिने छ ।”