काठमाडौँ, माघ २५ गते । खुम्जुङ युथ क्लब, नाम्चे युथ क्लब र खुम्बु युनाइटेड क्लबले १५औँ खुम्बु ल्होसार कप फुटबल प्रतियोगिता आइतबार जित हात पारेका छन् ।
सातदोबाटोस्थित एन्फा कम्प्लेक्समा खुम्जुङले खुम्बु याङबु शेर्पा समाजलाई १–० गोलले हरायो । जितमा ‘प्लेयर अफ दि म्याच’ पासाङ शेर्पाले निर्णायक गोल गर्नुभयो ।
महेन्द्र ज्योति पूर्व विद्यार्थी मञ्च, फराकको आयोजनामा भइरहेको प्रतियोगितामा नाम्चेले ठमिछेवा फुटबल टिमलाई २–० गोलले हरायो । नाम्चेका विशाल मगर र सुदिप राईले गोल गर्नुभयो । नाम्चेका तेन्जिङ फुन्सोक शेर्पा ‘प्लेयर अफ दि म्याच’ घोषित हुनुभयो ।
अन्तिम खेलमा खुम्बुले आमादब्लम युथ क्लब २–१ गोलले पाखा लगायो । खुम्बुका ‘प्लेयर अफ दि म्याच’ मिङमा राजभण्डारी र तेन्जिङ डेविड शेर्पाले समान एक एक गोल गर्नुभयो । आमादब्लमका आम्बेले १ गोल फर्काउनुभयो ।
१४ पिक्स एक्सपेडिसन प्रालिको मुख्य प्रायोजन तथा हेली एभरेष्ट प्रालि र खुम्बु पासाङ ल्हामु गाउँपालिकाको सह–प्रायोजनमा भइरहेको प्रतियोगिताअन्तर्गत सोमबार खुन्डे कम्युनिटी क्लब र खुम्बु याङबु शेर्पा समाज तथा आयोजक मञ्च र खुम्जुङ युथ क्लब भिड्ने छन् ।
