काठमाडौं, असार ३० गते । नेपाली कांग्रेसकी नेत्री पुष्पा भुसाल (गौतम)ले प्रतिनिधिसभाको उपसभामुख पदमा उम्मेदवारी दर्ता गराउनुभएको छ ।
शुक्रबार प्रतिनिधिसभाको उपसभामुख निर्वाचन हुँदैछ । निर्वाचनका लागि बिहीबार मनोनयन दर्ताको कार्यसूची रहेको छ । सोही कार्यसूची अनुसार सत्ता गठबन्धनको तर्फबाट भुसालले आज मनोनयन दर्ता गराउनुभएको हो ।
भुसालको प्रस्तावकमा नेकपा (माओवादी केन्द्र)का प्रमुख सचेतक देवप्रसाद गुरूङ र समर्थकमा नेकपा (एकीकृत समाजवादी) का लक्ष्मीकुमारी चौधरी हुनुहुन्छ ।
बुधबार सार्वजनिक कार्यसूची अनुसार आज बिहान ११ बजेदेखि दिउँसो १ बजेसम्मका लागि मनोनयनको समय तोकिएको छ ।
मनोनयन पश्चात आजै दिउँसो साढे १ बजे उम्मेदवारको सूची प्रकाशन गर्ने कार्यसूची रहेको छ ।
मतदान शुक्रबार दिउँसो ३ बजेदेखि सुरु हुने छ । तत्कालीन उपसभामुख शिवमाया तुमबाहाम्फेले राजीनामा दिनुभएपछि करिब तीन वर्षदेखि उक्त पद रिक्त रहेको छ ।
