प्रदेश र स्थानीय तहका कर्मचारीको अभिलेख बन्दै

काठमाडौँ, मङ्सिर १३ गते । प्रदेश र स्थानीय तहका गरी ५२ हजार कर्मचारीको अभिलेख पहिलो पटक व्यवस्थापन हुने भएको छ । स्थानीय तहमा समायोजन भएका कर्मचारी, प्रदेश लोक सेवा आयोगले प्रदेश र स्थानीय तहका लागि माग गरिएका कर्मचारी र साबिक स्थानीय निकायका कर्मचारी गरी ५२ हजार ४९७ कर्मचारीको अभिलेख व्यवस्थापन हुन लागेको हो । 

प्रदेश लोक सेवा आयोगबाट प्रदेशमा पदपूर्ति भएका करिब १० हजार कर्मचारी, स्थानीय तहमा समायोजन भएका ३१ हजार कर्मचारी, स्थानीय सेवामा लोक सेवा आयोगबाट भर्ना भएका नयाँ नौ हजार चार सय कर्मचारी, साबिक स्थानीय निकाय १२ हजार ९७ जना कर्मचारी सेवा हस्तान्तरण भएका विभिन्न आयोगलगायतका कर्मचारीको अभिलेख व्यवस्थापन हुन लागेको हो । 

प्रदेश र स्थानीय तहका कर्मचारीको अभिलेख नहुँदा ती कर्मचारीको कोष तथा लेखा नियन्त्रण कार्यालयबाट तलबी प्रतिवेदनसमेत पारित हुन सकेको थिएन । प्रदेश र स्थानीय तहका कर्मचारीको अभिलेखको अभावमा कर्मचारीको नियुक्ति, अवकाश मिति, सरुवा, बढुवालगायतका समस्याले कर्मचारीले अन्योलका बिचमा नै कामकाज गर्दै आएका थिए ।  

राष्ट्रिय किताबखाना (निजामती) ले गत कात्तिक १६ देखि २७ गतेसम्म सात वटै प्रदेशमा प्रदेश र स्थानीय सेवाका कर्मचारीको सूचना व्यवस्थापन प्रणाली हस्तान्तरण गरेसँगै प्रदेश र स्थानीय तहमा कार्यरत कर्मचारीको व्यक्तिगत सूचना प्रणाली (पिआइएस) कार्यान्वयनमा आएको हो ।  

राष्ट्रिय किताबखाना (निजामती) का महानिर्देशक श्रवणकुमार पोखरेलले प्रदेश र स्थानीय सेवाका कर्मचारीको पनि सात वटै प्रदेशमा अभिलेख व्यवस्थापन भएसँगै प्रशासनिक सङ्घीयताको एउटा पाटो पूरा भएको बताउनुभयो । 

उहाँका अनुसार अब कर्मचारीले काम गर्ने कार्यालय, कर्मचारीको सङ्गठन तथा पद दर्ता, उक्त पदमा कार्यरत कर्मचारीको सङ्केत नम्बर (सिटरोल दर्ता) कर्मचारीको एक कार्यालयबाट अर्को कार्यालयमा भएको सरुवा बढुवा भएको मिति, कर्मचारीले सेवा अवधिभरमा प्राप्त गरेका पुरस्कार, तालिम, सञ्चित बिदा, व्यक्तिगत विवरण, नाम थर, ठेगाना, कर्मचारीले मान्ने धर्मलगायतका विवरण एकद्वार प्रणालीबाट प्राप्त गर्न सकिन्छ । कर्मचारीको मृत्युपछि कर्मचारीको परिवार निवृत्तिभरणका लागि समेत चाहिने अभिलेख एकद्वार प्रणालीबाटै प्राप्त गर्न सकिने छ । पोखरेलले भन्नुभयो, “यसअगाडि प्रदेश र स्थानीय सेवाका कर्मचारीको अभिलेख व्यवस्थापन नहुँदा कर्मचारीको व्यक्तिगत विवरण पाउन झन्झट थियो ।”  

२०७५ सालमा कर्मचारी समायोजन हुँदा साबिकका केन्द्रमा रहेका कर्मचारीमध्ये सङ्घमा ४१ हजार ३४२ जना, प्रदेशमा १३ हजार १७२ र स्थानीय तहमा ३१ हजार ७७३ जना कर्मचारी समायोजन भएका थिए । 

कर्मचारीमा उत्साह 

लुम्बिनी प्रदेश मुख्यमन्त्री तथा मन्त्रीपरिषद्को कार्यालयका प्रदेश सचिव कवीन्द्र नेपालले प्रदेशका कर्मचारीको अभिलेख व्यवस्थापन गर्न सातै प्रदेशमा सफ्टवेयर राष्ट्रिय किताबखाना (निजामती) ले हस्तान्तरण गरेसँगै अब प्रदेशको कर्मचारीको पनि अभिलेख व्यवस्थापन हुने बताउनुभयो । उहाँले भन्नुभयो, “अब कर्मचारीको अभिलेख व्यवस्थापन हुन्छ, यसले प्रदेशका कर्मचारीलाई सहज बनाएको छ ।”  

खोटाङको दिक्तेल रूपाकोट मझुवागढी नगरपालिकाका साबिक स्थानीय निकायका कर्मचारी मोहनकुमार भट्टराईले राष्ट्रिय किताबखाना (निजामती) ले प्रदेश र स्थानीय सेवाका कर्मचारीको अभिलेख व्यवस्थापनको हस्तान्तरण गर्नु स्वागतयोग्य भएको बताउनुभयो । उहाँले भन्नुभयो, “यसले प्रदेश र स्थानीय सेवाका कर्मचारीलाई समस्या हुँदै आएको थियो, पिआइएससहितको अभिलेख व्यवस्थापनले कर्मचारीमा नयाँ उत्साह थपिएको छ ।”