हरिकृष्ण शर्मा
मुक्तिनाथ (मुस्ताङ), भदौ १७ गते । गण्डकी प्रदेशको ’लाइफलाइन’ मानिएको उत्तर–दक्षिण जोड्ने कालीगण्डकी कोरिडोरको जोमसोम–कोरला सडक आयोजना अन्तर्गत बारागुङ मुक्तिक्षेत्र गाउँपालिका–४,कागखोलामा बेलिब्रिज निर्माण सम्पन्न भएको छ ।
वि.सं २०८० साल साउन २८ गते कागखोलमा आएको बाढीले बगाएपछि बेनी नगरपालिका–९,राहुघाट नदीमा प्रयोगविहीन अवस्थामा रहेको बेलिब्रिजलाई लगेर जडान गरिएको हो । बेलिब्रिज निर्माणका लागि कालीगण्डकी कोरिडोरको जोमसोम–कोरला सडक आयोजनाले ढुवानी, मर्मतसहित सम्पूर्ण कार्यका लागि ३५ लाख लागतमा लम्बाइ ३६ मिटर र चौडाइ ५.४ मिटरको बेलिब्रिज निर्माण गरिएको आयोजनाका इन्जिनियर विष्णु चापागाईंले बताउनुभयो ।
यस वर्ष मनसुनमा कागखोलामा पानीको वहाव बढेपछि पटकपटक सडक कागबेनी–कोरला सडकमार्ग अवरुद्ध भएको थियो । कागखोलामा बेलिब्रिज बनेपछि बारागुङ मुक्तिक्षेत्र–३ छुसाङ हुँदै उपल्लो मुस्ताङको लो–घेकरदामोदरकुण्ड र लोमान्थाङ गाउँपालिका हुँदै कोरला नाकासम्म जाने स्थानीय तथा पर्यटकलाई सास्ती हुने गरेको थियो । बारागुङ मुक्तिक्षेत्र गाउँपालिकाका अध्यक्ष रिङजिन नामगेल गुरुङले बेलिब्रिजका लागि गरिएको प्रयास सफल भएको बताउनुभयो । ‘‘बेलिब्रिजबाट सवारीसाधन आवतजावत गर्न थालेका छन्,अब कागखोलामा बाढीपहिरो आउँदा पनि समस्या हुँदैन ।’’
गाउँपालिका अध्यक्ष गुरूङले सङ्घीय सडक सुपरीवेक्षण तथा अनुगमन कार्यालयसहित विभिन्न निकायमा पत्राचार गरिएको थियो । यसबिच आयोजना कागबेनी–छुसाङ सडक बारागुङ मुक्तिक्षेत्र गाउँपालिका–५ कागबेनीदेखि वडा ३ छुसाङ खण्डको १० किलोमिटर कालोपत्रे गर्न बहुवर्षीय ठेक्का अन्तर्गत पहिलो चरणमा ९ दशमलव ८ किलोमिटर कालोपत्रको काम सुरू गरिएको छ । तक्सर इफ्फाटा बुद्ध जेभीसँग ठेक्का सम्झौता भएअनुसार कालोपत्रे गर्न २८ करोड ८७ लाख रुपियाँ विनियोजन गरिएको छ ।
