गोरखापत्र समाचारदाता
काठमाडौँ, भदौ १४ गते । प्रधानमन्त्री केपी शर्मा ओलीले आसन्न चीन भ्रमणमा नेपालको हित र प्रतिष्ठालाई माथि उठाउने बताउनुभएको छ । भ्रमणका विषयमा प्रतिनिधि सभामा जानकारी दिँदै प्रधानमन्त्री ओलीले समसामयिक विषयमा नेपालको अवधारणा तथा प्राथमिकताको प्रस्तुतिबाट मुलुकको छवि एवं प्रतिष्ठा अभिवृद्धि हुने विश्वास पनि व्यक्त गर्नुभयो ।
चीनको थियानजिन सहरमा आयोजना हुने साङ्घाई सहयोग सङ्गठन (साङ्घाई कोअपरेसन अर्गनाइजेसन) को शिखर सम्मेलन (एससिओ) मा भाग लिन प्रधानमन्त्री ओली पाँचदिने भ्रमणका लागि भदौ १४ गते चीन जानुहुने कार्यक्रम छ । अधिवेशन चलिरहेका बेला राष्ट्रको नेतृत्व गरेर विदेश जानुअघि र फर्र्किएपछि संसद्लाई जानकारी दिने अभ्यास अनुसार प्रधानमन्त्रीले प्रतिनिधि सभामा सम्बोधन गर्नुभएको हो । “यस भ्रमणबाट नेपाल र जनवादी गणतन्त्र चीनबिचको मैत्रीपूर्ण द्विपक्षीय सम्बन्ध थप सुदृढ हुनुका साथ एससिओ शिखर सम्मेलनमा मेरो सहभागिताले अन्तर्राष्ट्रिय मञ्चमा विभिन्न समसामयिक विषयमा नेपालको अवधारणा एवं प्राथमिकताको प्रस्तुतिबाट मुलुकको छवि एवं प्रतिष्ठा अभिवृद्धि हुने मैले विश्वास लिएको छु,” संसद्मा प्रधानमन्त्रीले भन्नुभयो, “माननीयज्यूहरूलाई विश्वास दिलाउन चाहन्छु, नेपालको हित र प्रतिष्ठालाई माथि उठाउने गरी मेरो नेतृत्वमा गएको प्रतिनिधिमण्डलले काम गर्ने छ । यसमा विश्वस्त रहन यस गरिमामय संसद्लाई म आग्रह गर्न चाहन्छु ।’’
शिखर सम्मेलनका क्रममा विभिन्न देशका राष्ट्र तथा सरकार प्रमुखसँग पनि द्विपक्षीय भेटवार्ता गर्ने कार्यतालिका छ । प्रधानमन्त्रीले संसद्लाई दिनुभएको जानकारी अनुसार रुसी महासङ्घका राष्ट्रपति भ्लादिमिर पुटिन, माल्दिभ्सका राष्ट्रपति डा. मोहमद मिज्जु, कम्बोडियाका प्रधानमन्त्री डा. सोमदेक मोहा बोरभोर तिपाहदे हुन महानेटसँग द्विपक्षीय भेटको कार्यक्रम छ । लाओसका प्रधानमन्त्री सोनेसाई सिपानडोन तथा भियतनामका प्रधानमन्त्री फाम मिन चिङसँग भेटवार्ता तय भइसकेको पनि प्रधानमन्त्रीले बताउनुभयो ।
हैजा नियन्त्रण प्रयासबारे जानकारी
प्रधानमन्त्री ओलीले मधेश प्रदेशको पर्सामा हैजा नियन्त्रणका लागि सरकारले गरेको प्रयासबारे पनि सदनमा जानकारी गराउनुभयो । प्रधानमन्त्री ओलीका अनुसार अहिलेसम्म ६२४ जनामा सङ्क्रमण देखिएको र ४३७ जना निको भइसकेका छन् । १८७ एक्टिभ केस रहेको उहाँले बताउनुभयो । गएको २४ घण्टामा ८४ वटा नयाँ केस पुष्टि भएको पनि उहाँले जानकारी गराउनुभयो । यसबिचमा तीन जनाको निधन भएको पनि प्रधानमन्त्रीले बताउनुभयो ।
सङ्क्रमणको स्रोत पहिचानको काम भइरहेको पनि प्रधानमन्त्रीको भनाइ छ । स्वास्थ्य परीक्षण, नियन्त्रणका लागि सरकारले अधिकतम प्रयत्न जारी राखेको पनि प्रधानमन्त्रीले जानकारी दिनुभयो ।
