नवीनराज कुइँकेल
लमजुङ, भदौ १३ गते । लमजुङमा चालु आर्थिक वर्षमा १४ वटा मोटरेबल पुल निर्माण हुने भएको छ । पुल निर्माणका लागि २३ करोडभन्दा बढी बजेट विनियोजन भएको छ ।
गण्डकी प्रदेश सरकारले पूर्वाधार विकास कार्यालय मार्फत विभिन्न नदी तथा खोलाहरुमा मोटरेबल पुल निर्माणका लागि २३ करोड २९ लाख रुपियाँ बजेट पठाएको हो । गण्डकी प्रदेश सरकारले बहुवर्षीय योजना अन्तर्गत जिल्लाका अति आवश्यक स्थानमा मोटरेबल पुल निर्माणका लागि बजेट विनियोजन गरेको हो । प्रदेश सरकारले निर्माण सुरु भएर अधुरा रहेका मोटरेबल पुल र चालु आर्थिक वर्षदेखि निर्माण शुरु गर्ने नयाँ पुलका लागि बजेट पठाएको हो ।
पूर्वाधार विकास कार्यालय लमजुङका प्रमुख नरेशराज जोशीका अनुसार चालु आर्थिक वर्षमा मोटरेवल पुल निर्माणका लागि ४० लाख रुपियाँदेखि तीन करोड रुपियाँसम्म बजेट प्राप्त भएको छ । मध्यनेपाल–४, सिसाघाट अन्तर्गत मादी नदि मोटरेबल पुल र दुधपोखरी गाउँ पालिका अन्तर्गत कुनाघाटमा चेपे खोलामा निर्माणाधीन मोटरेवल पुलका लागि प्रति योजना ४० लाख रुपियाँ छुट्याइएको छ ।
कार्यालयका अनुसार सबैभन्दा बढी रकम मर्स्याङ्दी गाउँपालिका अन्तर्गत स्याँगेमा वडा नम्बर ४ र ५ जोड्ने मर्स्याङ्दी नदीको मोटरेवल पुलका लागि तीन करोड रुपियाँ विनियोजन भएको छ । राईनासको महादेवस्थास्थित तार्दीखोला मोटरेबल पुल र बेलौतीविसौना–भोटेचौर जोड्ने मर्स्याङ्दी नदी मोटरेबल पुलका लागि प्रति योजना दुई करोड ५० लाख रुपियाँ विनियोजन भएको छ ।
त्यसैगरी चालु आर्थिक वर्षमा प्रति योजना दुई करोड विनियोजन भएका चारवटा योजना छन् । दोर्दीको साधीखोला मोटरेबल पुल, किसेदी खोला पुल, मध्यनेपालको खहरेखोला मोटरेबल पुल, क्ब्होलासोँथारको बालुवाबेंसीस्थित रुदी खोला मोटरेबल पुलका लागि दुई करोड रुपियाँ बजेट छ । यसैगरी बेंसीशहर नगरपालिका अन्तर्गत पुमाखोला मोटरेबल पुलका लागि एक करोड ८४ लाख रुपियाँ विनियोजन गरेको छ भने दोर्दी गाउँपालिका अन्तर्गत करौती खोला मोटरेबल पुलका लागि एक करोड ६० लाख रुपियाँ विनियोजन गरेको छ ।
त्यस्तै दुधपोखरी गाउँपालिका अन्तर्गत भुम्लीचोकमा लाग्दीखोला मोटरेबल पुलका लागि एक करोड २५ लाख रुपिया छ भने मध्यनेपाल नगरपालिकाको गलौदी खोला मोटरेबल पुलका लागि ८० लाख रुपियाँ छ । बजेट विनियोजन भएका मोटरेबल पुल योजनामध्ये केही योजनाको गत आर्थिक वर्षमै टेण्डर आह्वान भइसकेको पूर्वाधार विकास कार्यालय लमजुङले जनाएको छ ।
