गुणबहादुर रोका
सुलीकोट, भदौ १३ गते । उत्तरी गोरखाको माछीखोला-लार्के भञ्ज्याङ सडक अनिश्चितकालका लागि बन्द भएको छ । धार्चे गाउँपालिका-३ दोभानस्थित खोत्राङ खोला वारी शुक्रबार बिहान ६ बजे ठुलो पहिरो र ढुङ्गा खसेर पूरै सडक भासिँदा माछीखोला-लार्के भञ्ज्याङ सडक अनिश्चितकालका लागि बन्द भएको हो ।
धार्चे गाउँपालिकाबाट चुमनुब्री गाउँपालिका पुग्ने मुख्य सडकमा ठुलो पहिरो गएपछि सवारीसाधन र पैदल यात्रीहरुलाई सडक मार्ग पूर्णरुपमा बन्द गरिएको र बन्द गरिएको सडक बाटो प्रयोग नगर्न सबै यात्रीलाई धार्चे गाउँपालिकाले शुक्रबार एक सार्वजनिक सूचना जारी गरेको छ ।
उक्त सडकको भासिएर खुलाउने बाटो कतै पनि नभएपछि वैकल्पिक रुपमा डाईभर्सनको व्यवस्था गर्न सकिने अवस्था छैन, धार्चे गाउँपालिकाका अध्यक्ष लक्ष्मण गुरुङले भन्नुभयो, ‘अप्ठ्यारो ठाउँमा भिषण पहिरो गएकाले उक्त सडक भएर यात्रा नगरी जोखिम नमोल्न गाउँपालिका आग्रह गर्दछ ।’
उत्तरी गोरखा पुग्ने सडक मार्ग तथा पदमार्ग भएकाले पनि पहिरो रोकिएपछि पालिकासँग भएको जेसिबी प्रयोग गरी जति सक्दो चाँडै बाटो खुलाएर सवारीसाधनलाई आवतजावतमा सहज बनाइने गाउँपालिकाले जनाएको छ । सडक तथा बाटो अवरुद्धले नागरिकमा पर्न गएको असुविधाप्रति पालिकाले क्षमा याचना गरेको छ ।
उत्तरी गोरखमा परेको अबवरल वर्षाले सडक नै भासिएपछि सवारीसाधनहरुलाई पूर्ण रुपमा रोक लगाइसकेकाले जोखिम मोलेर यात्रा नगर्न धार्चेका निर्मित प्रमुख प्रशासकीय अधिकृत विनायक तिमेल्सनाले आग्रह गर्नुभयो ।
शुक्रबार धार्चे गाउँपालिकाले एक सूचना जारी गर्दै सडक पुर्णरुपमा नबन्दा सम्म लागि सवारी आवतजावतमा पूर्ण रुपमा बन्द गरिएको धार्चे गाउँपालिकाले निमित्त प्रमुख प्रशासकीय अधिकृत विनायक तिमेल्सनाद्वारा हस्ताक्षरित सूचनामा जनाइएको छ ।
