उपनिर्वाचनमा अझै भएन उम्मेदवार चयन

भैरहवा समाचारदाता 

भैरहवा, भदौ १३ गते । आगामी कात्तिक १७ गते हुने प्रतिनिधि सभा सदस्य उपनिर्वाचनलाई लक्षित गर्दै नेपाली कांग्रेसले रुपन्देही–३ मा आन्तरिक तयारीलाई तीव्रता दिएको छ । पार्टी महामन्त्री विश्वप्रकाश शर्मा साउन र भदौमा दुई पटक स्थलगत अवलोकन गर्दै स्थानीय नेता कार्यकर्तासँग छलफल गरी पार्टीको अवस्था, समस्या र समाधानका उपायबारे सुझाव लिनुभएको छ । 

कांग्रेस रुपन्देही–३ का सभापति सुशील गुरुङका अनुसार महामन्त्री शर्माले क्षेत्रीय समिति, वडा सभापति, भ्रातृ संस्था, पालिका र वडाका निर्वाचित प्रतिनिधि तथा पूर्वप्रत्याशीसँग चुनावी तयारीबारे कुराकानी गर्नुभएको हो । गुरुङले भन्नुभयो, “उहाँले निर्वाचन जित्न पार्टीले के गर्नु पर्छ भनेर सुझाव लिनुभयो ।” 

यसअघि साउन ९ गते पार्टीले पदाधिकारी बैठकमा लुम्बिनी प्रदेश सभापति अमरसिंह पुन, जिल्ला सभापति रामकृष्ण खाण र २०७९ मा सोही क्षेत्रबाट प्रतिनिधि सभा सदस्यका प्रत्याशी केन्द्रीय सदस्य बालकृष्ण खाणसहितलाई बोलाएर ब्रिफिङ लिएको थियो ।

यद्यपि उम्मेदवारबारे औपचारिक छलफल भने सुरु भएको छैन । सभापति गुरुङका अनुसार केन्द्रबाट सिफारिसका लागि पत्र आउन बाँकी छ । अनौपचारिक रूपमा भने भदौ तेस्रो सातासम्म उम्मेदवार टुङ्ग्याउने भनिएको छ ।

कांग्रेस स्रोतका अनुसार २०७९ को आमनिर्वाचनमा सोही क्षेत्रमा प्रतिस्पर्धा गरेका पूर्वमन्त्री बालकृष्ण खाण पुनः उम्मेदवार बन्न चाहँदा पार्टीले उहाँलाई प्राथमिकता दिने तयारी छ तर खाणले इच्छा नदेखाएमा रामचन्द्र ढकाल पहिलो विकल्पका रूपमा हुनुहुन्छ । ढकाल पुराना नेता भए पनि २०७९ को प्रदेश सभा निर्वाचनमा पराजित हुनुभएको थियो ।