पहिरोले सडक बन्द भएपछि १५ सय कन्टेनर चिनियाँ क्षेत्रमा अड्किए

चित्रकुमार मिजार 
सिन्धुपाल्चोक, भदौ १३ गते । लगातारको वर्षातले बाह्रबिसे–कोदारी लोकमार्गको कोदारीखण्ड(इको)मा पहिरो जाँदा तातोपानी भन्सार आउन लागेका एक हजार पाँच सय बढी मालबाहक कन्टेनर चिनियाँ क्षेत्रमा रोकिएका छन् ।

तीन सातासम्म इको पहिरोले अवरुद्ध कोदारीखण्ड सडक भदौ ७ गतेदेखि इको पहिरोले पुनः बन्द गराएपछि तातोपानी भन्सार आउन लागेका कन्टेनरहरु चिनियाँ क्षेत्रको मितेरीपुलपारि, खासा, सिगात्से, न्यालम लगायतका क्षेत्रमा उक्त सङ्ख्याका कन्टेनर रोकिएको नेपाल हिमालय सीमापार वाणिज्य संघका अध्यक्ष रामहरि कार्कीले जानकारी दिनुभयो । वर्षात रोकिएपछि सडक सुचारु गरिए पनि चार दिनमै फेरि वर्षातले सो सडक बन्द भएको छ ।

सीमावर्ती क्षेत्र लिपिङ, कोदारी, तातोपानीसम्मका ४ किलोमिटर सडक वर्षातले अवरुद्ध हुँदै आउने गरेको छ । चार दिन सडक सूचारु हुदाँ चिनियाँ क्षेत्रमा रोकिएका ६० भन्दा बढी मालबस्तु बोकेका कन्टेनर तातोपानी भन्सार जाँचपासका लागि भित्रिएका थिए । जाँचपास भएका कन्टेनर राजधानी पुगिसकेका छन् । सोही समयमा नेपालबाट चिनियाँ भूभागमा ३५ वटा बढी खाली कन्टेनर चीनतर्फ प्रवेश गरेका थिए । तर पुनः वर्षातले इको पहिरो झरेर कोदारी सडकखण्ड बन्द भएपछि तातोपानी भन्सार आउन लागेका मालबाहक कन्टेनर चिनियाँ क्षेत्रमा नै रोकिन बाध्य भएको नेपाल हिमालय सीमापार वाणिज्य संघका अपाध्यक्ष सुजित बस्नेतले सुनाउनुभयो । इको पहिरोपारि नेपाली सीमाभित्रको कोदारी बजार, लिपिङ बजार क्षेत्रमा मालबस्तु बोकेका कन्टेनर यत्रतत्र रोकिएका छन् ।

नजिकिएको चाडपर्व दशैँ, तिहारका मालबस्तु बोकेका कन्टेनरहरु चिनियाँ गोदामै महँगो भाडा तिरेर पार्किङ गरी बस्न बाध्य छन् । वर्षा नरोकिएका कारण इको पहिरो निरन्तर बगिरहेकोले सडक खुलाउन नसकिएको सिन्धुपाल्चोक उद्योग वाणिज्य संघका अध्यक्ष बुद्धराज बस्नेतले दुखसो सुनाउनुभयो । लगातार भइरहेको वर्षात पहिरोले सडक पुरिरहेको छ, यस्तो बेला सडक खुलाएमा पहिरोमाथिका लालवीर चोक, कोदारी गुम्बा खस्ने जोखिम हुने उहाँले बताउनुभयो । सडक डिभिजन कार्यालय चरिकोटले पनि वर्षात रोकिएपछि सडक खुलाउन लाग्ने जनाएको छ ।

इको पहिरोले कोदारी सडकखण्ड तीनसाता बन्द हुदाँ मजदुरलाई बोकाएर सामान तारिएको थियो । स्याउ, किवी, लसुन, आँप, प्याज, नास्पाती, अंगुर लगायतका फलफुलजन्य र मसलाजन्य बस्तु बोकेका कन्टेनर रोकिदाँ उक्त बस्तुहरु कुहिन र सड्न थालेपछि व्यापारी, व्यवसायीले मजदुरलाई बोकाएर पहिरो कटाएका थिए । त्यसरी बोकेर पहिरो कटाएका बस्तुलाई पुन कन्टेनरमा राखेर तातोपानी भन्सार जाँचपास गरेर काठमाडौं पुगेको स्याउ व्यवासायी शारदाप्रसाद पराजुलीले जानकारी दिनुभयो । मजदुरलाई बोकाएर पहिरो कटाएपछि बढ्ने लागत उपभोक्तालाई पर्ने छ ।