नौ वटा झोलुङ्गे पुल निर्माण

हुम्ला समाचारदाता

हुम्ला, भदौ १३ गते । एक वर्षको अवधिमा हुम्लामा नौ वटा नयाँ झोलुङ्गे पुल निर्माण भएका छन् । छ वटा गाउँपालिकामा पर्ने खोला तथा कर्णाली नदीमाथि ती झोलुङ्गे पुल निर्माण भई सञ्चालनमा आएका छन् । गत आर्थिक वर्ष २०८१/८२ मा नौ  वटा झोलुङ्गे पुल निर्माण भएर सञ्चालनमा आएको पूर्वाधार विकास कार्यालयका सबइन्जिनियर झुलबहादुर शाहीले बताउनुभयो । निर्माण भएर सञ्चालनमा आएका झोलुङ्गे पुलमा चार वटा स्नोल्यान्ड एकीकृत विकास केन्द्र र हिमालयन कन्जरभेसनको समन्वययमा निर्माण गरिएका हुन् । 

उहाँका अनुसार यसरी निर्माण गरिएका झोलुङ्गे र ट्रस ब्रिजमा नाम्खा गाउँपालिका–२ को छोसाङमा ३२ मिटर लम्बाइमा ट्रस ब्रिज, सिमकोट गाउँपालिका–१ को तल्लो ठाडोसाँघुको ६८ मिटर लामो झोलुङ्गे पुल,  खार्पुनाथ गाउँपालिका–४ को ३२ मिटर लामो नल्नाखोला ट्रस ब्रिज, खार्पुनाथ गाउँपालिका–१ र २ को ९५ मिटर लम्बाइएको लिगे झोलुङ्गे पुल रहेका छन् । त्यसै गरी सर्केगाड गाउँपालिका–२ को ६२ मिटर लम्बाइको जुम्ली गुम्ब झोलुङ्गे पुल, सर्केगाड गाउँपालिका– ५ र ७ को ३२ मिटर लामो भ्युपार्न ट्रस ब्रिज, अदानचुली गाउँपालिका–३ को ३२ मिटर लामो पानीघट्ट ट्रस ब्रिज र ताँजाकोट गाउँपालिका २ र ४ को १०२ मिटर लम्बाइ रहेको हुङ्गारखोलामा पनि नयाँ झोलुङ्गे पुल बनेका छन् ।  यी पुल निर्माण गर्न ४० लाख ६८ हजार ७३८ रुपियाँदेखि ९९ लाख ८७ हजार ७८८ रुपियाँसम्म लागत लागेको छ ।