नवराज श्रेष्ठ
रामेछाप, जेठ ८ गते । रामेछापमा एम्बुलेन्स दुर्घटना हुँदा तीन जना घाइते भएका छन् । घाइतेमध्ये दुई जनाको अवस्था गम्भीर छ । जिल्लाको दोरम्बा शैलुङ गाउँपालिकाबाट शवसहित पाँज जना बोकेर काठमाडौँ जाँदै गरेको प्रदेश–३–०३–००२ झ. ५८०३ नम्बरको एम्बुलेन्स खाँडादेवी गाउँपालिका–३ को चार घरे जङ्गलमा बिहीबार मध्याह्नमा दुर्घटना भएको हो ।
दोरम्बा शैलुङ गाउँपालिका–२ बाट शव, एक जना प्रहरी जवानसहित पाँच जना बोकेको एम्बुलेन्समा सवार यात्रुलाई पाँच मिनेट लागेपछि खाँडादेवी गाउँपालिका–३ को चार घरे जङ्गलमा रोकिएको थियो ।
पाँच मिनेट गरेपछि फेरी चढ्दै गर्दा एक्कासि एम्बुलेन्स गुडेर सडकबाट करिब १०० मिटर तल झरेको इलाका प्रहरी कार्यालय चोप्राङ रामेछापका प्रहरी सहायक निरीक्षक गणेश देवकोटाले जानकारी दिनुभयो ।
दुर्घटनामा परी गम्भीर घाइते बनेका दुई जनालाई उपचारका लागि काठमाडौँ पठाइएको उहाँले बताउनुभयो । एम्बुलेन्समा सवार प्रहरी जवान सकुशल रहेको र एम्बुलेन्स चालक सामान्य घाइते भएको प्रहरीको भनाइ छ ।
