वसन्त पराजुली/नारायणगढ समाचारदाता
नारायणगढ, जेठ २५ गते । चीन र भारतमा पाइने ‘चाइनिज पोन्ड हेरोन’ प्रजातिको चरा नेपालको चितवनमा पनि भेटिएको छ ।
चराका क्षेत्रमा लामो समयदेखि अध्ययन अनुसन्धान गर्दै आउनुभएका वासु विडारीले ‘चाइनिज पोन्ड हेरोन’ चरा नेपालमा पहिलो पटक देखापरेको जानकारी दिनुभयो ।
चितवनको खैरहनी नगरपालिका वडा नम्वर ११ स्थित गैडहवामा पहिलो पटक यो चरा भेटिएको हो । बकुल्ला जातको यो चरा फेला परेसँगै नेपालमा भेटिने चराको प्रजातिको सङ्ख्या बढेको छ ।
नेपालमा हालसम्म ८९० प्रजातिका चरा रेकर्ड भएका छन् जसमध्ये चितवनमा मात्रै ६५० प्रजातिका रहेका बताइन्छ ।
सौराहाका नेचर गाइड तथा फोटोग्राफर राजु तामाङले जुलाई १ तारिखमा पहिलो पटक यो चरालाई देखेपछि उहाँले रियर वर्ड कमिटिसँग परामर्शमा पुग्नुभएको थियो । कमिटीले प्रमाणित गरेसँगै नयाँ प्रजातिको चरा नेपालमा पनि सूचीकृत भएको विडारीले गोरखापत्र अनलाइनलाई बताउनुभयो ।
‘चाइनिज पोन्ड हेरोन’ एक किसिमको फिरन्ते चरा हो । चीनको पूर्वी भेग, भारतको पूर्वी र दक्षिणी भेग तथा भियतनाममा यो चरा भेटिन्छ । नेपालमा भने यो फिरन्तेकै रुपमा आइपुगेको हुनसक्ने बताइन्छ । विशेष त माछा, भ्यागुतालाई आफ्नो आहारा बनाउने यो चरा सिमसार क्षेत्रमा बस्न रुचाउँछ ।
“यो चरा अहिले एक्लै देखिएकाे छ । यसले आफ्नो बथान पनि छाडेर एक्लिएको हुनसक्छ”, वर्ड एजुकेशन सोसाइटी चितवनका पूर्व अध्यक्षसमेत रहनुभएका विडारीले भन्नुभयो ।
