लायन्स भलिबलमा पाहुना टोली इरानको विजयी सुरुवात

माधवप्रसाद बराल

माछापुच्छ्रे (कास्की) वैशाख १८ गते । प्रथम लायन्स कप राष्ट्रिय तथा अन्तर्राष्ट्रिय आमन्त्रित पुरुष भलिबल प्रतियोगितामा पाहुना टोलीले विजयी सुरुवात गरेको छ ।   

लायन्स इन्टरनेसनल डिस्ट्रिक्ट ३२५ एम नेपालको आयोजनामा पोखरा रङ्गशालास्थित बहुउद्देश्यीय कभर्ड हलमा बिहीबार भएको उद्घाटन खेलमा इरानको टोलीले विभागीय टोली एपिएफलाई ३—१ को सेटमा पराजित गरेको हो । 

इरानी टोलीले पहिलो सेट २५—२०, तेस्रो सेट २५–२३ र चौथो सेट २५–१९ ले एपिएफलाई पराजित गरेको हो । दोस्रो सेटमा एपीएफले ३१–२९ ले इरानी टोलीलाई हराएको थियो । 

भलिबलमा सहभागी ६ टोलीलाई दुई समूहमा विभाजन गरिएको छ । समूह ‘ए’ मा इरानी टोली, एपिएफ र गण्डकी प्रदेश छन् । समूह ‘बी’ मा भारतीय टोली, त्रिभुवन आर्मी क्लब र नेपाल पुलिस क्लब छन् । दुबै समूहबाट शीर्ष दुईमा रहने टोलीले सेमिफाइनल खेल्ने छन् । फाइनल खेल वैशाख २२ गते हुने छ । 

प्रतियोगिताको विजेताले ४ लाख ४४ हजार ४ सय ४४ र उपविजेताले २ लाख ४४ हजार ४ सय ४४ रुपियाँसहित ट्रफी, मेडल र प्रमाणपत्र पाउनेछन् । तेस्रो हुने टोलीले १ लाख ४४ हजार ४ सय ४४ पाउने छ । 

सर्वोत्कृष्ट खेलाडीलाई १४ हजार ४ सय ४४ र विधागततर्फ उत्कृष्ट हुनेलाई ८ हजार ४ सय ४४ रुपियाँ प्रदान गरिने छ । प्रतियोगिताको उद्घाटन पोखरा महानगरपालिका प्रमुख धनराज आचार्यले गर्नुभएको हो ।