गोरखापत्र समाचारदाता
काठमाडौँ, चैत २३ गते । चलचित्र ‘झिल्को’ को ‘नाच पुतली’ बोलको गीत सार्वजनिक भएको छ । शुक्रबार सार्वजनिक गरिएकोे गीत मार्मिक भावनासँग जोडिएको छ, जसमा दुःखी बालिकालाई फकाउँदै उसलाई खुसी बनाउने प्रयास गरिएको देखिन्छ । गीतमा आनन्द अधिकारीको शब्द, दीपक शर्माको सङ्गीत र साहिमा श्रेष्ठको स्वर रहेको छ ।
गीतको भिडियोमा आस्मा विश्वकर्मा र चाहना पुनको आकर्षक नृत्य प्रस्तुति देख्न सकिन्छ । चलचित्रमा मोबाइलको अत्यधिक प्रयोगका कारण सम्बन्धमा आउने दरार, व्यक्तिबिचको दुरी र वास्तविक जीवनभन्दा डिजिटल संसारमै गुम्सिँदै गएका पात्रको कथा देखाइएको निर्देशक यादवकुमार भट्टराईले बताउनुभयो ।
चलचित्रमा आयुषी ढकाल, सुनील पोखरेल, वर्षा सिवाकोटी, विशाल पोखरेल, भोलाराज सापकोटा, जेनिस श्रेष्ठ र जेभिस श्रेष्ठको अभिनय रहेको छ । चलचित्रको कथा तथा पटकथा निर्देशक भट्टराईले अरुणदेव जोशी र देव व्रतसँग मिलेर तयार पार्नुभएको हो । चलचित्र वैशाख १९ गते देशभर प्रदर्शनमा आउने छ ।
