धादिङबेँसी समाचारदाता
धादिङबेँसी, चैत २३ गते । उत्तरी धादिङलाई जोड्ने दामन–पाख्रिन मार्गको धादिङबेँसी–साङ्कोस सडकखण्डको स्तरोन्नतिसहित कालोपत्रे गर्ने कार्य सुरु भएको छ । चार दशकअगाडि सुरु भएको यस सडकको १६ किलोमिटर क्षेत्रमा स्तरोन्नतिसहित कालोपत्रे गर्न थालिएपछि स्थानीयले खुसी व्यक्त गरेका छन् ।
सधैँ धुलोको हैरानी बेहोरेर यात्राको सास्ती खेपिरहेका नागरिक सडकको प्रगति देखेर खुसी भएका हुन् । स्थानीय बासिन्दा कर्णकुमारी योगीले भन्नुभयो, “धुलोले खाना खानै गाह्रो हुन्थ्यो, स्वास्थ्यमा गम्भीर असर परिरहेको थियो । अब भने लामो समयदेखिको समस्या अन्त्य हुने आशा जागेको छ ।”
सडक निर्माणसँगै अब धादिङबेँसी पुग्न सजिलो हुने भएकाले सवारीचालक पनि उत्साहित छन् । सवारीचालक किरण थापामगरका अनुसार सडक कालोपत्रे कार्यले यात्रा सहज मात्र नभई सुरक्षित पनि बनाउने छ ।
भौतिक पूर्वाधार मन्त्रालयको ३६ करोड रुपियाँको लागतमा धादिङबेँसीदेखि नेत्रावती डबजोङ गाउँपालिकाको केरुन्जासम्म १६ किलोमिटर सडक कालोपत्रे गर्ने गरी सम्झौता भएको थियो । विभिन्न कारणले आयोजना अघि नबढ्दा पटक पटक म्याद थपेर मात्र काम हुन सकेको हो । निर्माण कार्यमा संलग्न वरिष्ठ इन्जिनियर सागरकुमार झाका अनुसार सडक कालोपत्रेको काम तीव्र गतिमा अघि बढिरहेको छ । उहाँले भन्नुभयो, “समय लागे पनि सडकले स्थानीयको दैनिकी सहज बनाउने छ ।”
