टोपलाल अर्याल
रेसुङ्गा, चैत २२ गते । गुल्मी उद्योग वाणिज्य सङ्घको निर्वाचनमा ९१.४५ प्रतिशत मत खसेको छ । शुक्रबार अध्यक्ष पदका लागि मृगेन्द्रप्रसाद श्रेष्ठ र रामप्रसाद पन्थीले उम्मेद्वारी दिएपछि निर्वाचन भएको हो । वाणिज्य सङ्घका ५८५ मध्ये ९१.४५ प्रतिशत अर्थात ४३२ पुरुष र १०३ महिला गरेर ५३५ मत खसेको निर्वाचन अधिकृत विष्णु बलालले जानकारी दिनुभयो ।
अध्यक्ष बाहेकका सबै पद सर्वसम्मत चयन भएका छन् । वाणिज्य सङ्घको उपाध्यक्षमा इश्वरीप्रसाद बेलबासे, गोपालप्रसाद भुसाल र तारा भुसाल सर्वसम्मत निर्वाचित हुनुभएको छ । त्यस्तै, महासचिवमा चेत नारायण पाण्डेय, सचिवमा विष्णु अधिकारी, कोषाध्यक्षमा इश्वरी कंडेल र सहकोषाध्यक्षमा कृष्ण खनाल सर्वसम्मत निर्वाचित हुनुभएको निर्वाचन समितिले जनाएको छ ।
सदस्यहरूमा महेशकुमार राज भण्डारी, मदन श्रेष्ठ, तोमलाल पन्थी, ज्ञानबहादुर भलामी, किशोरप्रसाद मरासिनी, रामु सुनार, चन्द्रमणी भण्डारी, चन्द्रमणी पाण्डेय, कमला श्रेष्ठ र शशी केसी निर्वाचित हुनुभएको छ । वाणिज्य सङ्घमा एक अध्यक्ष, उपाध्यक्ष तीन, महासचिव एक, सचिव एक, कोषाध्यक्ष एक, सह–कोषाध्यक्ष एक, महिला सदस्य दुई र खुला सदस्य आठ जना रहने व्यवस्था छ ।
