प्रवीणकुमार शर्मा
चन्द्रपुर (रौतहट), चैत २२ गते । रौतहट उद्योग वाणिज्य सङ्घमा तालाबन्दी भएको छ । सङ्घको वर्तमान कार्य समितिको कार्यशैली प्रति असन्तुष्ट बनेका व्यवसायीहरूको समूहले मुख्य प्रवेशद्वारमा ताला लगाएका हुन् ।
असन्तुष्ट व्यवसायीहरूको तर्फबाट राकेशकुमार झा, विकास विक्रम साह, कौशल साहलगायतका व्यापारीहरूले शुक्रबार सङ्घको कार्यालयको मुल गेटमा ताला लगाएका हुन् । आम उद्योगी, व्यवसायीहरूको हकहित, सामाजिक दायित्व निर्वाह तथा संरक्षणको लागि मर्यादित संस्थालाई कार्य समिति अध्यक्ष तथा महासचिवले नीजि स्वार्थका कारण गैरकानुनी ढङ्गले बन्धक बनाउन खोजेका कारण बाध्य भएर तालाबन्दी गर्नुपरेको गौर वडा नम्बर १ का व्यापारी कौशल साहले बताउनुभयो ।
विशेष साधारणसभा तथा अधिवेशन तोकिएपछि विधान विपरित नयाँ सदस्यता दर्ता गराइएकाले विधान अनुरूप निकास निकाल्न व्यापारीहरूको साझा माग रहेको व्यापारी विकास विक्रम साहले बताउनुभयो ।
उद्योग वाणिज्य सङ्घ रौतहटको विशेष साधारणसभा तथा अधिवेशनका लागि भोलि (शनिबार)का दिन समय तोकिएको थियो ।
चैत २३ गते तोकिएको विशेष साधारणसभा तथा अधिवेशन अध्यक्ष पण्डितप्रसाद जयसवालले स्थगित भएको सूचना प्रकाशन गर्नुभएलगत्तै महासचिव रविन्द्रनाथ गोपालीले तोकिएकै समयमा हुने सूचना जारी गर्नु भएको थियो ।
उद्योग वाणिज्य सङ्घ रौतहटको वर्तमान कार्यसमितिको पदावधी यहि चैत २६ गतेसम्म मात्र रहेकाले समयमै सक्षम नेतृत्व आउनुपर्ने र त्यसका लागि साधारणसभा तथा अधिवेशन तोकिएको समयमै हुनुपर्ने सङ्घका महासचिव गोपालीको माग रहेको छ ।
