'अराजकता नियन्त्रणमा लिन तीनकुनेमा प्रहरीले बल प्रयोग गर्‍यो'

काठमाडौँ, चैत २० गते। नेपाल प्रहरीले चैत १५ गतेको प्रदर्शनमा अराजक गतिविधि नियन्त्रणमा लिन बल प्रयोग गरेको बताएको छ। 

प्रहरी प्रधान कार्यालयमा बुधबार आयोजित पत्रकार सम्मेलनमा केन्द्रीय प्रवक्ता प्रहरी नायब महानिरीक्षक दिनेशकुमार आचार्यले सञ्चारकर्मीसँग कुरा गर्नुहुँदै प्रदर्शनकारी अराजक भइ निषेधित क्षेत्र प्रवेश गर्न खोज्दा प्रहरी र प्रदर्शनकारीबिच झडप भएको तथा अराजक गतिविधि नियन्त्रणमा लिन प्रहरीले बल प्रयोगको सिद्धान्त अनुरुप संयमित भइ कमभन्दा कम बल प्रयोग गरिएको बताउनुभयो। 

उहाँले उक्त दिन मध्यान्ह १२ः१५ मा तीनकुने क्षेत्रको पार्किङस्थलबाट प्रदर्शनकारीको भीड अगाडि बढेको दृश्य सिसीटिभी क्यामेरामा कैद भएको बताउनुभयो। संसद भवन, सिंहदरबार कब्जा गर्ने भन्ने माइकिङसहित प्रदर्शनकारीले निषेधित्र क्षेत्र तोड्न खोजेको सिसीटिभीमा देखिएको छ।

प्रदर्शनको नेतृत्व गरिरहेको दुर्गा प्रसाइले प्रहरीमाथि दुर्घटना गराउने उद्देश्यले तीव्र गतिमा कार हाँकेको, ढुङ्गामुढा हानेको, आगलागी गराएको जस्ता अराजक गतिविधि भएको भन्नुहुँदै उहाँले प्रहरीलाई जानकारी गराइएकोभन्दा अकल्पनीय घटना घटेको उहाँको भनाइ छ। 

उहाँले अराजक गतिविधिमा सङ्लग्न व्यक्तिलाई कानुनी दायरामा ल्याइने बताउनुभयो।