चैत मसान्तसम्म एकतर्फी कालोपत्रे

पश्चिम नवलपरासी समाचारदाता

पश्चिम नवलपरासी, चैत २० गते । नारायणगढ–बुटवल सडकखण्ड अन्तर्गत पश्चिम खण्डमा चैत मसान्तसम्ममा (दाउन्ने पहाडबाहेक) एकतर्फी रूपमा सबै सडक कालोपत्रे हुने भएको छ । अहिले बुटवलदेखि बर्दघाटसम्म कालोपत्रेको काम धमाधम भइरहेको छ । बर्दघाटको बजार क्षेत्र, बुटवलको केही भागसँगै भलुहीमा सडक कालोपत्रे बाँकी रहेकाले एकतर्फी रूपमा चैत मसान्तसम्म कालोपत्रेले जोड्ने कामलाई तीव्रता दिइएको पश्चिम खण्डका आयोजना प्रमुख शशाङ्क मिश्रले जानकारी दिनुभयो । 

पश्चिम खण्डको ४८ किलोमिटरमध्ये ३१ किलोमिटर कालोपत्रे भइसकेको छ । दुईतर्फी १५ किलोमिटर कालोपत्रे सम्पन्न भएको आयोजनाले जनाएको छ । बर्दघाटदेखि बुटवलसम्मको ४२ किलोमिटर सडकखण्डमा पर्ने सानाठुला सबै पुलको निर्माणको काम अन्तिम चरणमा पुगेको छ । एउटाबाहेक सबै पुलको काम सकिएको आयोजना प्रमुख मिश्रले बताउनुभयो । 

मुख्य समस्याका रूपमा दाउन्ने पहाड देखिएको छ । पहाड काटेर सडक फराकिलो पार्ने, कलभर्ट निर्माण गर्नेलगायतका काम जारी रहेकाले दाउन्नेमा दैनिक जाम हुने गरेको छ । दाउन्नेमा समयमै काम पूरा नभए वर्षायाममा समस्या हुने भएकाले कामलाई तीव्रता दिइएको आयोजनाले जनाएको छ । दाउन्ने पहाडमा तीन लेनमा सडक विस्तार हुँदै छ । जसका कारण दाउन्ने खण्डमा पहाड काट्नुपर्ने हुन्छ । वर्षायामअगाडि नै कालोपत्रे गर्ने ठेकेदारले प्रतिबद्धता जनाएकाले बुटवलतर्फको काम सकेपछि दाउन्नेमा केन्द्रित हुने आयोजनाले जनाएको छ । बर्दघाटबाट खुर्सानीखोलासम्म छिट्टै कालोपत्रे गर्ने काम सुरु हुने मिश्रले बताउनुभयो । अहिले पश्चिम खण्डको भौतिक प्रगति ६१ प्रतिशत रहेको छ । २०७५ चैतमा सुरु भएर २०७९ साउनमा सडक निर्माण सम्पन्न हुनुपर्नेमा समयमै काम पूरा नभएपछि ठेकेदार कम्पनी चाइना स्टेट कन्स्ट्रक्स्न कर्पोरेसन लिमिटेडले तेस्रो पटकका लागि गत साउनमा एक वर्षको म्याद थप पाएको थियो । उक्त म्याद सकिन अब चार महिना मात्र बाँकी छ ।