नवराज नेपाली
बागलुङ (गलकोट), चैत २१ गते । बागलुङको हरेक वर्षजस्तै यस वर्ष पनि चैते दसैँको अवसरमा बागलुङ–कालिका भगवती गुठी व्यवस्थापन समितिले मेलाको ऐतिहासिक चैत्राष्टमी मेलाको आयोजना गरेको हो ।
बागलुङ कालिका भगवती मन्दिर परिसरमा बुधबारदेखि मेला सुरु भएको छ । यस वर्ष गुठी संस्थानसँगको सहकार्यमा मेलासँगै धार्मिक सम्मेलन सुरु भएको छ । यस वर्षको चैत्राष्टमी मेला बुधबारदेखि २५ गतेसम्म चल्नेछ । मेलाको उद्घाटन गर्दै गण्डकी प्रदेशका मुख्यमन्त्री सुरेन्द्रराज पाण्डेले धार्मिक पर्यटन प्रदेशको आर्थिक बिकासको प्रमुख स्रोत भएको बताउनुभयो । धार्मिक पर्यटकीय क्षेत्रहरुको बिकास र प्रबर्धनका लागि तीन तहका सरकारले कार्यक्रम ल्याउनु पर्नेमा उहाँले जोड दिनुभयो ।
यहाँका धार्मिक पर्यटकीय क्षेत्र घुम्न आउने आन्तरिक तथा वाह्य पर्यटकलाई केही समय अडिने वातावरण बनाउँदा त्यसले प्रदेश र स्थानीय तहको अर्थतन्त्रमा महत्वपूर्ण भूमिका निर्वाह गर्ने उहाँले बताउनुभयो । प्रदेश सरकारले धार्मिक पर्यटकीय क्षेत्रको देश बिदेशमा प्रबर्धनको काम थालेको भए पनि स्रोत अभावका कारण सोचेजस्तो उपलव्धि हाँसिल हुन नसकेको मुख्यमन्त्री पाण्डेले बताउनुभयो ।
देश बहुभासिक, बहुसांकृतिक र बहुधार्मिक राष्ट्र भएको भन्दै पाण्डेले धर्म र संस्कृतिको माध्यामबाट देशको भुगोल र प्रकृतिको समेत प्रचार गर्न सकिने बताउनुभयो । आर्थिक बिकासको नविनतम उद्यम क्षेत्र पर्यटन भएको भन्दै उहाँले पर्यटन र पर्यटकको रुचिसँग जोडिएका क्षेत्रको बिकास र प्रबर्धनमा ध्यान दिनुपर्नेमा जोड दिनुभयो ।
चैते दसैँको अवसरमा कालिका भगवती मन्दिर दर्शनका लागि लाखौँ दर्शनार्थी आउने गरेका बागलुङ कालिका भगवती गुठी व्यवस्थापन समितिका अध्यक्ष कुमार खड्काले जानकारी दिनुभयो ।
पर्यटन प्रवर्धन, संस्कृतिको संरक्षण, स्थानीय उत्पादनको प्रचारप्रसार र परम्पराको निरन्तरता दिने उद्देश्यले मेला आयोजना गरिँदैआएको गुठी व्यवस्थापन समितिका अध्यक्ष खड्काले जानकारी दिनुभयो । पछिल्ला वर्षहरूमा विभिन्न ठाउँहरूमा व्यापारिक मेलाहरू आयोजना हुनेगरेको भए पनि नेपालकै प्राचीन मेला मानिएको यो मेलाको आफ्नै महत्त्व र इतिहास रहेको पाका व्यक्तिहरुको भनाइ छ ।
चैते दसैँ मेलामा घरायसी प्रायोजनका सामग्रीहरू डाला, नाङ्ला, ठेका, हातहतियार लगायतका वस्तुहरूको परापूर्वकालदेखि नै किनमेल हुने गरेको छ । चैते दसैँमा बागलुङ कालिका मन्दिरमा टाढा–टाढाका जिल्ला र भारतबाट समेत भक्तजनहरूको आगमन हुने गरेको छ ।
मेलामा पालिकास्तरीय पुरुष भलिबलको विजेतालाई नगद दुई लाख ट्रफी, मेडल र प्रमाणपत्र, द्वितीय हुनेलाई नगद एक लाख ट्रफी, मेडल र प्रमाणपत्र, सेमिफाइनल पुग्ने समूहलाई नगद २५ हजारसहित मेडल र प्रमाणपत्र तथा उत्कृष्ट खेलाडीलाई नगद पाँच हजार, ट्रफी र प्रमाणपत्र प्रदान गरिने भएको छ । त्यसैगरी, खुला महिला भलिबल प्रतियोगिता, छेलो प्रतियोगिता र दोहोरी गीत प्रतियोगितासमेत आयोजना गरिएको कालिका भगवती गुठी व्यवस्थापन समितिका उपाध्यक्ष निशान खडकाले बताउनुभयो । मेलामा स्थानीय तथा राष्ट्रिय कलाकारहरूको समेत प्रस्तुति रहने बताइएको छ ।
