रामकृष्ण बोहोरा
बागलुङ, चैत २१ गते । गण्डकी प्रदेशका मुख्यमन्त्री सुरेन्द्रराज पाण्डेले धार्मिक, जातीय, भाषिक, क्षेत्रीय भावनालाई भड्काएर सदियौंदेखिको सामाजिक सद्भावलाई खलबलाउने प्रयत्न सफल नहुने बताउनुभएको छ ।
बागलुङ कालिका भगवती गुठी व्यवस्थापन समितिले चैतेदसैँका अवसरमा आयोजना गरेको धार्मिक पर्यटन तथा गुठी महोत्सवको बुधबार उद्घाटन गर्नुहुँदै मुख्यमन्त्री पाण्डेले भन्नुभयो, ‘धार्मिक उन्मादका नाममा केही अराजक तìवले समाजलाई भड्काएर आफ्नो स्वार्थसिद्ध र आफू स्थापित हुने निरर्थक प्रयत्न गरेका छन् ।”
मरिसकेको राजतन्त्र फर्काउने नाममा पछिल्लो समय केही अराजक तत्वले देशमा अवाञ्छित गतिविधि बढाइरहेको चर्चा गर्दै मुख्यमन्त्री पाण्डेले यस्ता गतिविधिप्रति सबैले गम्भीर भएर सोच्ने बेला आएको बताउनुभयो ।
धर्म र जातिको नाममा विभाजित हुँदा कतिपय मुलुकको अवस्था दयनीय बनेको बताउँदै उहाँले भन्नुभयो, “आवेग र भावना नबगी देशमा सामाजिक सद्भाव कायम राख्न हामी सबै एकताबद्व हुनु पर्छ ।” गण्डकी प्रदेशमा कामकाजको भाषाका लागि नेपालीसहित गुरुङ र मगर भाषालाई छिट्टै प्रयोगमा ल्याउने पाण्डेले जानकारी दिनुभयो । उहाँले स्थानीय मदिरालाई कानुनी रूपमा वैधता दिने विषयमा पनि सदनमा छलफल चलिरहेको बताउनुभयो ।
कालिका मन्दिर परिसरमा सयौँ वर्षदेखि मेला लाग्दै आएकामा यस वर्ष धार्मिक सम्मेलन गर्न लागिएको हो । सम्मेलनमा देशभरका विभिन्न मठमन्दिरका सन्तमहन्त तथा व्यवस्थापन समितिका पदाधिकारीको सहभागिता छन् । सम्मेलनमा गुठी संस्थानका तर्फबाट भीम नेपाल र राजेन्द्र दाहालले कार्यपत्र प्रस्तुत गर्नुभएको थियो । धार्मिक सम्मेलन भोलि बिहीबारसम्म चल्ने छ ।
