राधाकृष्ण डुम्रे
वालिङ (स्याङ्जा), चैत २० गते। स्याङ्जाको कालीगण्डकी गाउँपालिका स्थित मिर्मी बहुमुखी क्याम्पसको स्वतन्त्र विद्यार्थी युनियन सहमतीका आधारमा गठन गरिएको छ। स्ववियु गठनको विषयले एक महिना देखि क्याम्पसमा विवाद रहँदै आएको थियो। विभिन्न राजनीतिक दलहरूसँगको छलफल पछि सहमतिमा स्ववियु गठन गरिएको क्याम्पस प्रमुख रामप्रसाद पाण्डेयले जानकारी दिनुभयो। विगत एक महिनाको निरन्तर प्रयास पश्चात सहमती जुटेको उहाँको भनाइ छ।
स्ववियुको सभापतिमा अनेरास्ववियुका मुना न्यौपाने चयन हुनुभएको छ। यस्तै उपसभापतिमा नेविसङ्घका प्रतिक्षा भट्टराई र कोषाध्यक्षमा नेविसङ्घका सपना न्यौपाने चयन हुनुभएको छ। सचिवमा अनेरास्ववियुका कशिस बस्याल तथा सहसचिवमा अनेरास्ववियु (क्रान्तिकारी) का सृष्टि कुँवर क्षेत्री चयन हुनु भएको निर्वाचन अधिकृत भीमप्रसाद श्रेष्ठले जानकारी दिनुभयो।
यस्तै सदस्यमा अनेरास्ववियुका दिपीका पाण्डेय, सिवानी थापा र रुकमाया सुनार, नेविसङ्घका अस्मिता पाण्डेय र भूमा न्यौपाने तथा अनेरास्ववियु (क्रान्तिकारी)का ईरिका न्यौपाने निर्वाचित हुनुभएको अधिकृत श्रेष्ठले जानकारी दिनुभयो।
११ सदस्यीय समितिमा सभापति सहित पाँच जना अनेरास्ववियुबाट, उपसभापतिसहित चार जना नेविसङ्घबाट र सहसचिव सहित दुई जना अनेरास्ववियु (क्रन्तिकारी)बाट चयन भएको अधिकृत श्रेष्ठले जानकारी दिनुभयो। नवगठित स्ववियुका पदाधिकारी तथा सदस्यले बुधबार शपथ तथा पदभार ग्रहण गरेका छन्।
स्ववियु गठनको बारेमा विवाद हुँदा सञ्चालक समितिका १२ जनाले सामूहिक राजीनामा दिएका थिए भने पार्टीबिच आरोप प्रत्याराेप चल्दै आएको थियो।
