.jpg)
बेनी समाचारदाता
म्याग्दी (बेनी), चैत २१ गते । म्याग्दी र कालीगण्डकी नदी कटानका कारण जोखिममा रहेका बस्ती संरक्षणका लागि चालु आर्थिक वर्षमा आठ वटा ठुला नदी संरक्षण योजना सञ्चालन गरिएको छ । सिँचाइ तथा जलस्रोत व्यवस्थापन आयोजना कार्यालय पोखरामार्फत कार्यान्वयन हुने उक्त योजनाको लागत अनुमान २१ करोड ५४ लाख रुपियाँ छ ।
नदी संरक्षण योजनामार्फत म्याग्दी र कालीगण्डकी नदी कटानका कारण जोखिमा परेका म्याग्दी र पर्वत जिल्लाका बस्तीलाई संरक्षण गर्ने आयोजनाको लक्ष्य रहेको छ । आयोजनाले दिएको जानकारी अनुसार एक करोड ५५ लाख रुपियाँमा ठेक्का सम्झौता गरेको साहाना–बिआरटी जेभी पर्वतले बेनी नगरपालिका–४, तातोपानीस्थित सरस्वती माविमुनि कम्पोजिट प्रविधिको पर्खाल निर्माण सुरु गरेको आयोजना कार्यालय पोखराका इन्जिनियर नरजङ्ग गुरुङले बताउनुभयो ।
उहाँका अनुसार उक्त योजनाका लागि दुई करोड ७० लाख रुपियाँ लागत अनुमान गरिएको थियो । आगामी जेठ २० गतेभित्र निर्माण सम्पन्न गर्ने गरी म्याग्दी नदीको कटान नियन्त्रणका लागि ६६ मिटर लामो, चार मिटर चौडाइ भएको तीन/तीन मिटर अग्लो कङ्क्रिट र त्यसमाथि ग्याबिन पर्खाल निर्माण गर्ने योजना अन्तिम चरणमा पुगेको छ ।
यसै गरी मालिका गाउँपालिका केन्द्र दरबाङ बजार संरक्षण योजनामा ७० लाख र बेनी नगरपालिका–४ स्थित सिँगा बस्ती संरक्षण योजनामा विनियोजन भएको ७० लाख रुपियाँ बराबरको काम उपभोक्ता समितिमार्फत कार्यान्वयनमा लगिएको छ ।
जिल्ला प्रशासन कार्यालय र जिल्ला अदालत म्याग्दीलाई नदी कटानबाट जोगाउन म्याग्दी नदी किनारमा ६५ मिटर दुरी लामो कम्पोजिट पर्खाल निर्माणका लागि छ करोड १८ लाख रुपियाँ लागत अनुमान गरिएको ठेक्का मुल्याङ्कनको अन्तिम चरणमा पुगेको आयोजनाका इन्जिनियर गुरुङले जानकारी दिनुभयो ।
आयोजनाले तातोपानी बजार संरक्षणको दोस्रो प्याकेज अन्तर्गत म्याग्दी नदी किनारमा १०२ मिटर कम्पोजिट पर्खाल निर्माणका लागि तीन करोड ८१ लाख रुपियाँ लागत अनुमान गरिएको ठेक्का मूल्याङ्कनको अन्तिम चरणमा पुगेको छ ।
आयोजनाले पर्वतको कुस्मा नगरपालिका–४, अर्मादी र जलजला गाउँपालिका कार्यालय रहेको लामाखेतस्थित कालीगण्डकी नदी किनारमा पाँच करोड लागत अनुमान गरिएको नदी संरक्षण याजना सञ्चालन गरेको छ । उक्त योजनामा दुवै स्थानमा ४८/४८ मिटर लम्बाइ भएको कम्पोजिट पर्खाल निर्माण गरिने छ । बेनीको कालीपुलपारि जलजला गाउँपालिका–३ स्थित कालीगण्डकी नदी किनारमा ८० मिटर कम्पोजिट पर्खाल निर्माण गर्न दुई करोड ८० लाख रुपियाँ लागत अनुमान गरिएको योजना सञ्चालनको तयारी गरिएको आयोजनाले जनाएको छ ।
म्याग्दी नदी किनारमा निर्माण हुने कम्पोजिट पर्खालले जिल्ला प्रशासन कार्यालय, जिल्ला अदालत, बहुउद्देयीय खेल मैदानसहित दरबाङ बसपार्क र नगरको वडा नम्बर ४ मा रहेको तातोपानी बजार नदी कटानबाट सुरक्षित हुने बेनी नगरपालिकाका प्रमुख सुरत केसीले बताउनुभयो ।
