भूकम्पपीडितका आवास पुनर्निर्माण सुरु

राजु लामिछाने

रुकुमपश्चिम, चैत ८ गते । रुकुमपश्चिमको चौरजहारी नगरपालिकाबाट भूकम्प प्रभावितको निजी आवास पुनर्निर्माणका लागि काम सुरु भएको छ । २०८० कात्तिक १७ गते जाजरकोट केन्द्रविन्दु भएर गएको भूकम्पबाट क्षति भएका घरको क्षति आकलनपछि पुनर्निर्माण सुरु भएको हो । 

चौरजहारी नगरपालिकाले दुई जना भूकम्प प्रभावित लाभग्राहीसँग निजी आवास निर्माणका लागि सम्झौता गरेर पुनर्निर्माणको काम सुरु भएको जनाएको छ । नगरपालिकाका निमित्त प्रमुख प्रशासकीय अधिकृत शेरप्रसाद ढकालका अनुसार वडा नं. २ का विष्णुप्रसाद गौतम र सुशीला रावतसँग सोही वडाका वडाध्यक्ष बीरबहादुर रानाले पुनर्निर्माणका लागि बुधबार सम्झौता गर्नुभएको हो । सम्झौतापछि गौतम र रावतलाई पुनर्निर्माणको पहिलो किस्ताबापत ५०/५० हजार रुपियाँसमेत उहाँहरूको खातामा जम्मा गरिसकेको निमित्त प्रमुख प्रशासकीय अधिकृत ढकालले जानकारी दिनुभयो । उहाँका अनुसार विपत् सूचना पोर्टलमा सोही वडाका १० जना लाभग्राहीको विवरण प्रविष्ट भएर पहिलो किस्ताको रकमसमेत आइसकेको छ । अन्य आठ जनाले आवास निर्माणका लागि नक्सापासलगायत अन्य मापदण्ड पूरा गर्ने काम गरिरहेकाले चाँडै नै उहाँहरूलाई पहिलो किस्ता उपलब्ध गराइने ढकालले उल्लेख गर्नुभयो । 

राष्ट्रिय विपत् जोखिम न्यूनीकरण तथा व्यवस्थापन प्राधिकरणबाट खटिएको प्राविधिक टोलीले क्षतिको विस्तृत आकलनको काम गरेको थियो । प्राधिकरणका उपसचिव रामबहादुर केसीका अनुसार क्षतिको आकलनपछि लाभग्राही पहिचान गर्नुका साथै जिल्ला विपत् व्यवस्थापन समितिले लाभग्राही स्वीकृत गरेपछि पुनर्निर्माणका लागि सम्झौता सुरु भएको हो । विस्तृत क्षति आकलन गरिएका अन्य स्थानमा पनि लाभग्राही पहिचान र स्वीकृतिको कामलाई उच्च प्राथमिकतामा राखी पुनर्निर्माणको काममा तीव्रता दिइएको केसीले उल्लेख गर्नुभयो । 

प्राविधिक टोलीले क्षति आकलनको कामपछि विपत् सूचना प्रणालीमा चौरजहारी नगरपालिका–२ का १० जना लाभग्राहीको नाम प्रविष्ट गरेको थियो । सोही आधारमा जिल्ला व्यवस्थापन समितिले प्राधिकरणमा आवास निर्माणका लागि सिफारिस गरेको थियो । 

विपत् प्रभावित निजी आवास प्रबलीकरण, पुनर्निर्माण तथा पुनस्र्थापना अनुदान कार्यविधि, २०८१ मा पुनर्निर्माणका लागि छनोट भएका लाभग्राहीले चार लाख रुपियाँका दरले अनुदान रकम प्राप्त गर्ने व्यवस्था रहेको छ । जाजरकोट भूकम्पका कारण चौरजहारी नगरपालिकामा मात्र सात हजार चार सय घरमा क्षति पुगेको छ । रुकुमपश्चिममा ३२ हजार ९९६ जना लाभग्राही कायम गरिएको जिल्ला प्रशासन कार्यालयको तथ्याङ्कमा उल्लेख छ ।