प्रेमराज सिम्खडा
कालीकोट, चैत ८ गते । सुर्खेत–जुम्ला (कर्णाली राजमार्ग) को यात्रा त्रासपूर्ण हुने गरेको छ । कर्णाली राजमार्गमा यात्रा गर्ने यात्रु सडकको जीर्ण अवस्था देखेपछि त्रासपूर्ण यात्रा गर्न बाध्य छन् ।
बाध्यतावश दोहोरिएर कर्णाली राजमार्गको यात्रा गर्नुपर्नेबाहेक एक पटक यात्रा गरेका यात्रु कर्णाली राजमार्गमा फेरि आउन असहज मान्ने गरेका छन् । अत्यन्त साँघुरो र त्यसैमा पनि भिरालो जमिनमा खनिएको सडक मर्मत नहुँदा ठुला खाल्टाखुल्टीले यात्रु तर्सने गरेका छन् । मोरङका नगिन्द्र आचार्यले कर्णाली राजमार्गको यात्रा अपेक्षा गरेको भन्दा जोखिमपूर्णका साथै रोमाञ्चक पनि भएको बताउनुभयो । पर्यटकीय क्षेत्र रारा घुम्न आएका उहाँले कतिपय ठाउँमा जीर्ण भएकाले मर्मत गर्न सुझाव दिनुभयो ।
यस्तै चितवनका रवि लामिछानेले पनि कर्णाली राजमार्गको यात्रा जोखिम र उत्साहजनक भएको बताउनुभयो । उहाँले राजमार्ग साँघुरो भएकाले फराकिलो बनाउन सरकारले पर्याप्त बजेट दिनुपर्ने र त्यसबाट सडकमा परेका खाल्टाखुल्टी पुर्नुपर्ने बताउनुभयो । बाँकेका रेणुका खड्काले माथि ठुला पहाड र तल कर्णाली नदीले राजमार्गमा यात्रा गर्दा रमाइलोका साथै जोखिमपूर्ण भएको बताउनुभयो । सरकारले कर्णाली राजमार्गलाई बर्सेनि मर्मत गर्ने गरेको छ तर अगाडि मर्मत गर्ने र पछि उस्तै जीर्ण हुँदै जाने भएकाले अवस्था सुधार हुन सकेको छैन ।
सडकका खाल्टाखुल्टी पुर्न बजेट आउँछ, मर्मत पनि हुन्छ तर नियमन गर्ने निकाय सक्रिय नहुँदा राजमार्गको लगानी खेर जाने गरेको सर्वसाधारण बताउँछन् । कालीकोटका निवर्तमान जिल्ला समन्वय समितिका सदस्य नेत्रराज शाहीले राजमार्गमा लगानी गरेको निकायले कस्तो काम भयो, सडक मर्मत कसरी गरिरहेका छन्, निर्माण व्यवसायीको अवस्था सबै कुराको अनुगमन नगर्दा राजमार्ग सुधार हुन नसकेको बताउनुभयो । खर्च देखाएर बिल उठाउने तर अवस्था जस्ताको तस्तै हुँदा राज्यको बजेट बालुवामा पानी हाले जस्तै हराउने गरेको उहाँको भनाइ छ ।
