खलङ्गा समाचारदाता
जाजरकोट, फागुन ४ गते । भूकम्पका कारण यहाँका ग्रामीण बस्तीमा खानेपानीको हाहाकार भएको छ । नलगाड नगरपालिका–५ स्थित ऐरारी, लबिसा, गर्छिन, पोखरा, खन्टाकुरा टोलका सर्वसाधारणले बर्सौंदेखि प्रयोग गरेका मुहान भूकम्प र सडक निर्माणका कारण भासिएपछि गाउँबस्तीमा खानेपानीको समस्या भएको हो ।
वातावरणीय प्रभाव मूल्याङ्कन (डिपिआर) नगरी हचुवाका भरमा खनिएका सडकले सुक्दै गएका पानीका मुहान गत वर्ष कात्तिक १७ को भूकम्पले झनै भासिएपछि धारामा पानी आउन छाडेको छ । भूकम्प गएको १५ महिना बितेको छ । लामो समय खानेपानीको हाहाकार हुँदा पनि सरोकारवाला निकाय, स्थानीय सरकारलाई कुनै चासो छैन ।
नलगाड नगरपालिका–५ का प्रेमबहादुर शाहीका अनुसार नगरका विभिन्न गाउँबस्तीमा आउने पानीका मुहान सुकेपछि आधा घण्टा हिँडेर पालो पर्खिएर पानी ल्याउनुपर्ने अवस्था छ । गाउँबस्तीमा आउने पानीका मुहान सुकेपछि खानेपानीको हाहाकार हुनुका साथै पानी लिन घण्टौँ पालो पर्खिनुपर्ने बाध्यता छ । ग्रामीण बस्तीलाई सडक सञ्जालमा जोड्न खानेपानीका मुहानमा क्षति पुग्ने गरी डिपिआर नगरी हचुवाका भरमा सडक खनेपछि पानीका मुहान सुकेका छन् । नलगाड नगरपालिका–५ को ऐरारी, लबिसा, गर्छिन, पोखरा, खन्टाकुरा गाउँबस्तीका करिब दुई सयभन्दा बढी घरघुरीले गाउँमा ल्याएको पानीका मुहान सुकेपछि खानेपानीको समस्या भएको छ । ऐरारी गाउँमा दुई किलोमिटर टाढाबाट ल्याइएको पञ्चासेको मुहान सुकेपछि ५० घरधुरीले लेखी खोरियाको पानी पालो पर्खेर ल्याउने गरेका छन् ।
नलगाड नगरपालिका–५ का दिलबहादुर वलीले माझगाउँबाट आएको पानी सुकेपछि गाउँदेखि मुनिको मुहानमा गाग्री बोकेर पालो पर्खी पानी ल्याउने गरेको बताउनुभयो । गाउँदेखि माथिको खानेपानी सडक खन्दा मुहान भासिएको र पानीको ट्याङ्की सडक खनेको माटोले पुरिएपछि करिब ५० घरधुरीलाई पानीको सङ्कट भएको छ । घरआँगनमै आउने पानी सुकेपछि पशुवस्तुलाई पनि टाढाबाट गाग्रीमा बोकेर खुवाउनुपर्ने बाध्यता छ ।
नलगाड नगरपालिका–५ की शारदा वलीले पानी ल्याउँदा बालबालिकाको पढाइ छुट्ने गरेको बताउनुभयो । उहाँले गाउँबस्तीमा खानेपानीको समस्या समाधानका लागि स्थानीय सरकारले पहल गर्नुपर्ने आग्रह गर्नुभयो । चैत वैशाखको खडेरीमा पानीको समस्या अझ बढ्ने देखिएको छ ।
