जयकृष्ण यादव
इनरुवा, माघ ५ गते । सुनसरीको धरानबाट एक जना लागू औषध कारोबारीलाई प्रहरीले पक्राउ गरेको छ । इलाका प्रहरी कार्यालय धरानका अनुसार धरान उप–महानगरपालिका वडा नं.१५ सुवेदी टोलबाट लागू औषध कारोबारीलाई पक्राउ गरेको हो ।
पक्राउ पर्नेमा धरान १४ का १८ वर्षीय किसान तामाङ छन् । लागू औषधको कारोबार भइरहेको सूचनाको आधारमा वडा प्रहरी कार्यालय धरानबाट खटिएको प्रहरी टोलीले खाली घरमा कालो झोलामा लुकाई छिपाई राखेको अवस्थामा लागू औषध ट्रामाडोल चार हजार २३० क्याप्सुल, प्रतिबन्धित औषधी स्पास्पेन तीन हजार २३० ट्याब्लेटसहित तामाङलाई पक्राउ गरेको जनाएको छ ।
तामाङमाथि इलाका प्रहरी कार्यालय धरानले थप आवश्यक अनुसन्धान गरिरहेको जनाएको छ ।
