काठमाडौं, माघ ३ गते । वैदेशिक रोजगारीमा आकर्षक तलबको प्रलोभनमा पारी जापान पठाइदिन्छु भन्दै रकम ठगी गरेको अभियोगमा प्रहरीले एक जनालाई पक्राउ गरेको छ ।
पक्राउ पर्नेमा दाङ तुलसीपुर उपमहानगरपालिका–६ घर भई काठमाडौं महानगरपालिका–१६ बालाजु बस्ने ३७ वर्षीय रमेश चौधरी छन् ।
जापान पठाइदिन्छु भन्दै एक जना पीडितबाट १३ लाख ३२ हजार पाँच सय रूपियाँ लिई सम्पर्कविहीन भएको भन्ने पीडितको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले रमेशलाई काठमाडौं नयाँबसपार्कबाट सोमबार पक्राउ गरेको हो ।
रमेशलाई आवश्यक अनुसन्धान तथा कारवाहीका लागि जिल्ला प्रहरी परिसर काठमाडौं भद्रकाली पठाइएको नेपाल प्रहरी प्रधान कार्यालयद्वारा जारी बुलेटिनमा उल्लेख छ ।
