काठमाडौँ, पुस २२ गते । नवौँ संस्करणको झिल्टुङ क्रसकन्ट्री दौड माघ ५ गते नुवाकोटमा हुने भएको छ । नुवाकोटको कोल्पुटार, बेलकोटगढीमा हुने दौडमा महिला र पुरुषका सात स्पर्धामा प्रतिस्पर्धा हुने आइतबार आयोजित पत्रकार सम्मेलनमा जानकारी दिइयो ।
आयोजक बेलकोटगढी नगरपालिकाका वडा नम्बर ५ का वडाध्यक्ष मदन भुजेलले नेपालको एथलेटिक्स क्षेत्रमा झिल्टुङ्ग दौडलाई मौलिक खेल प्रतियोगिताका रूपमा स्थापित गर्न लागिएको जानकारी दिनुभयो ।
दौडमा पुरुष र महिलाको खुला १३.५ किमी दौड, सोही दुरीको स्थानीय खुला दौड, १६ वर्षमुनिको खुला र स्थानीय ४.५ किमी, ४५ वर्षमाथिको भेट्रान १३.३ किमी, स्थानीय आमाको ४.५ किमी र स्थानीय वृद्ध पुरुष र महिलाको वाक एन्ड टक स्पर्धा समावेश गरिएको छ ।
