‘दुःखी आत्मा’ को पोस्टर सार्वजनिक

गोरखापत्र समाचारदाता

काठमाडौँ, पुस २ गते । दीपेन्द्र लामा लिखित तथा निर्देशित चलचित्र ‘दु:खी आत्मा’ को सोमबार फस्र्ट लुक पोस्टर  सार्वजनिक गरिएको छ । विभिन्न तीन डिजाइनका पोस्टरमध्ये एउटामा दयाहाङ राईलाई एक्लो देख्न सकिन्छ भने अर्कोमा राई र आँचल शर्मा प्रेमिल भावमा देखिन्छन् । अर्को एक पोस्टरमा भने दयाहाङ, आँचलका साथमा अनुपविक्रम शाही, बुद्धि तामाङ, रेअर राई, लोकेन्द्र लेखक र आशान्तशर्मालाई प्रस्तुत गरिएको छ ।

फागुन २ गते प्रदर्शन हुने चलचित्रको पोस्टरले दर्शकमा थप कौतूहल जगाउने देखिन्छ । क्लक वर्क क्रियसनको ब्यानरमा हिमाल कडरियाको निर्माण र सुदीप ढकाल कार्यकारी निर्माता रहेको चलचित्रमा कवि श्रवण मुकारुङका १० वटा कविता पनि समेटिएका छन् । आलोक शुक्लाले खिचेको चलचित्रको निमेष श्रेष्ठले सम्पादन गर्नुभएको छ ।