गोरखापत्र समाचारदाता
काठमाडौँ, मङ्सिर २८ गते । देवेन्द्र पाण्डेको निर्देशनमा साङ्गीतिक चलचित्र ‘जुनेली’ सार्वजनिक भएको छ । चलचित्रमा एक जोडीको प्रेम–बिछोडको कथा प्रस्तुत गरिएको निर्देशक पाण्डेले बताउनुभयो ।
निर्देशक पाण्डेले भन्नुभयो, “यसमा केही फरक कुरा पस्कने कोसिस गरेको छु ।” १७ मिनेटको चलचित्रमा गायिका समीक्षा अधिकारीको स्वर रहेको छ । गीतकार गोविन्द भट्टका शब्द र बाबुल गिरीको सङ्गीत रहने गीतले प्रेमपीडाको पनि कथा बोल्ने निर्देशक पाण्डेको भनाइ थियो । गीतमा प्रेम सुब्बा, कविता आले, सुवास गजुरेल, गीतकार गोविन्द भट्ट र मोडल रिना गुरुङको अभिनय देख्न सकिन्छ । गीतमा साहिल खानको सम्पादन र उत्सव दाहालको डिओपी रहेको छ ।
