चीन भ्रमण सम्पन्न गरी एमाले प्रतिनिधिमण्डल स्वदेश फिर्ता

काठमाडौँ, मङ्सिर ६ गते । नेकपा (एमाले) को उच्चस्तरीय प्रतिनिधिमण्डल चीन भ्रमण सम्पन्न गरी स्वदेश फिर्ता भएको छ । चिनियाँ कम्युनिष्ट पार्टीको निमन्त्रणामा एमाले वरिष्ठ उपाध्यक्ष ईश्वर पोखरेल नेतृत्वको प्रतिनिधिमण्डल आज स्वदेश फिर्ता भएको हो । 

प्रतिनिधिमण्डल गत कात्तिक २७ गते चीन गएको थियो । प्रतिनिधिमण्डल चीनको नानजिङमा भएको ‘दोस्रो ग्लोबल साउथ थिन्क ट्र्याङ्क फोरम’ कार्यक्रममा सहभागी हुनुका साथै चिनियाँ कम्युनिष्ट पार्टीका शीर्ष नेताहरुसँग भेटवार्ता समेत गरेको एमाले विदेश विभागका सदस्य दीपेन्द्र श्रेष्ठले जानकारी दिनुभयो । 

यस्तै, प्रतिनिधिमण्डलले चीनका जाङ्सु, उहान, बेइजिङलगायत ठाउँमा भएका विभिन्न कार्यक्रममा पनि सहभागिता जनाएको थियो । प्रतिनिधिमण्डलमा वरिष्ठ उपाध्यक्षसहित पार्टीका सचिव लेखराज भट्ट, स्थायी कमिटी सदस्य गोरखबहादुर बोगटीलगायत हुनुहुन्थ्यो ।