काठमाडौँ, मङ्सिर ५ गते । चौथो अल नेपाल अन्तर वडा टेबलटेनिस प्रतियोगिता मङ्सिर ११ देखि १५ गतेसम्म हुने भएको छ ।
स्पिन इभेन्ट्सको आयोजनामा लैनचौरस्थित टेबलटेनिस हलमा हुने प्रतियोगितालाई अखिल नेपाल टेबलटेनिस सङ्घले प्राविधिक सहयोग गर्नेछ ।
प्रतियोगितामा मेन्स सिंगल्स, वुमेन्स सिंगल्स ब्वाइज सिंगल्स यु–१६, गर्ल्स सिंगल्स यु–१६, मेन्स टिम, वुमेन्स टिम, भेट्रान टिम (४० वर्षमाथि), मेन्स भेट्रान सिंगल्स (४० वर्षमाथि), वुमेन्स भेट्रान सिंगल्स (४० वर्षमाथि), मेन्स भेट्रान सिंगल्स (५० वर्षमाथि) र मेन्स भेट्रान सिंगल्स (६० वर्षमाथि) गरी ११ स्पर्धामा प्रतिस्पर्धा हुने बुधबार आयोजित पत्रकार सम्मेलनमा जानकारी दिईयो ।
प्रतियोगितामा चार सय ५० जना खेलाडीको सहभागिता रहनेछ । मेन्स र वुमेन्स टिम इभेन्ट्स, भेट्रान टिम (४० वर्षमाथि) का शीर्ष तीन खेलाडीलाई क्रमशः ३०, १५ र सात हजार पाँच सय रुपियाँ तथा यु–१६ ब्वाइज सिंगल्स, गर्ल्स सिंगल्स र भेट्रान्स सिंगल्सका विजेता, उपविजेता र तेस्रो हुनेलाई क्रमशः १० हजार, पाँच हजार र २५ सय रुपियाँ पुरस्कार प्रदान गरिनेछ ।
