अविनाश चौधरी
धनगढी, मङ्सिर ५ गते । प्रहरीले भरुवा बन्दुकसहित दुई जनालाई पक्राउ गरेको छ । इलाका प्रहरी कार्यालय ब्रह्मदेव र सशस्त्र प्रहरी बल बिओपी खल्ला, कञ्चनपुरबाट खटेको प्रहरीको संयुक्त टोलीले उनीहरुलाई पक्राउ गरेको हो ।
पक्राउ पर्नेमा भीमदत्त नगरपालिका –९ टुँडीखेलका ५३ वर्षीय गगन तारामी र ५५ वर्षीय प्रेमबहादुर धामी रहेका सुदूरपश्चिम प्रदेश प्रहरी कार्यालयले जानकारी दिएको छ । सो कार्यालयका अनुसार भीमदत्त नगरपालिका –९ कालीगाडा खोलामा हतियारधारी समूहका १० जना थिए ।
प्रहरी गस्ती टोलीलाई देखेर अरु भाग्न सफल भए पनि दुई जनालाई नियन्त्रणमा लिइएको प्रहरीको भनाइ छ । दुई नाल भरुवा बन्दुक, दुई प्याकेट बारुद, बन्दुकको सीसा ३८ टुक्रा, क्याप १२ वटा, दुई खुकुरी जस्ता हातहतियारसहित उनीहरुलाई नियन्त्रणमा लिएको प्रहरीले जानकारी दिएको छ ।
