वसन्त पराजुली
नारायणगढ, मङ्सिर १ गते । नेपाली कांग्रेसले सुरु गरेको सय दिन अभियान चितवनमा सुरु भएको छ । कांग्रेसको केन्द्रीय कार्यक्रम अनुसार चितवनमा शनिबार पत्रकार सम्मेलन गरेर अभियान सुरु भएको हो ।
अभियानअन्तर्गत जिल्ला भरी नै विविध कार्यक्रमहरू गरी जनस्तरमा कांग्रेस पुग्ने र उनीहरूका दुःख मर्का बुझ्ने काम गरिने पत्रकार सम्मेलनमा जानकारी दिइयो ।
अभियानका क्रममा चितवन आइपुग्नु भएका केन्द्रीय प्रतिनिधि कांग्रेस नेता मधु आचार्यले लोकतन्त्रलाई बलियो बनाउन नागरिक समाज सक्रिय हुन जरुरी रहेको बताउनुभयो ।
“सहिलाई सही र गलतलाई गलत भनेर नागरिक समाज सक्रिय भएन भने यसले लोकतन्त्रलाई अप्ठ्यारोमा पार्छ’’, उहाँले भन्नुभयो ।
उहाँले अभियानका क्रममा जनस्तरबाट उठेका सवालहरूलाई पार्टीले आफ्नो मुद्दा बनाएर अघि बढ्ने प्रतिबद्धता पनि व्यक्त गर्नुभयो । उहाँले कांग्रेसको सङ्गठनका गतिविधि चलायमान गराउनु नै अभियानको मुख्य उद्देश्य भएको पनि बताउनुभयो ।
कार्यक्रममा बोल्दै नेपाली कांग्रेस चितवनका सभापति राजेश्वर खनालले पार्टी भित्र देखिएका असन्तुष्टिहरूलाई पनि अभियानले सम्बोधन गर्ने बताउनुभयो । अभियानमा जिल्ला, नगर र वडा स्तरमै विभिन्न कार्यक्रम गर्ने पनि उहाँले बताउनुभयो ।
