वासिङ्टन, कात्तिक २९ गते । अमेरिकी सरकारका लागि काम गर्ने एक व्यक्तिलाई बुधबार दायर गरिएको अदालतको कागजातअनुसार इरानमा आक्रमण गर्ने इजरायलको पहिलेको योजनाको मूल्याङ्कन गर्ने वर्गीकृत जानकारी चुहाएको आरोप लगाइएको छ ।
आसिफ विलियम रहमानका रूपमा पहिचान गरिएको व्यक्तिलाई यस हप्ता कम्बोडियामा एफबिआईले पक्राउ गरेको थियो । उनलाई गुआममा पहिलो पटक अदालतमा पेश गरिनेछ ।
उनलाई गत हप्ता भर्जिनियाको अमेरिकी अदालतमा ‘राष्ट्रिय रक्षा जानकारीको जानाजानी प्रसारण’ गरेको दुई मुद्दामा अभियोग लगाइएको थियो । यो आपराधिक आरोपमा महत्त्वपूर्ण जेल सजाय हुनसक्छ ।
रहमानसँग वकिल थिए वा कुन सङ्घीय एजेन्सीले उनलाई नियुक्त गरेको थियो भन्ने तुरून्त स्पष्ट भएन तर अधिकारीहरूले उनीसँग गोप्य सुरक्षा स्वीकृति थियो भनेका छन् ।
अभियोगहरू टेलिग्राम मेसेजिङ एपको च्यानलमा गत महिना देखापरेको नेसनल जियोस्पाटियल–इन्टेलिजेन्स एजेन्सी र नेसनल सेक्युरिटी एजेन्सीलाई श्रेय दिइएको कागजातहरूबाट आएको हो ।
कागजातहरूले इजरायलले अझै पनि अक्टोबर १ मा इरानको विस्फोटक ब्यालिस्टिक मिसाइल आक्रमणको प्रतिक्रियामा सैन्य आक्रमण गर्न सैन्य सरसामानहरू सार्दै गरेको उल्लेख गरेका छन् ।
इजरायलले अक्टोबरको अन्त्यमा इरानका धेरै स्थलमा जवाफी आक्रमण गरेको थियो ।
‘फाइभ आइज’ भनिने यी कागजात संयुक्त राज्य अमेरिका, बेलायत, क्यानाडा, न्युजिल्यान्ड र अस्ट्रेलियाले आपसमा साझेदारी गर्न योग्य थिए ।
न्युयोर्क टाइम्सले उनको गिरफ्तारीको पहिले रिपोर्ट गरेको थियो । रासस/एपी
