राजु लामिछाने
रुकुमपश्चिम, कात्तिक २८ गते । रुकुमपश्चिमको चौरजहारी नगरपालिका –३ मा अटोरिक्सा दुर्घटना भएको छ । दुर्घटनामा परेर दुई जना घाइते भएका छन् ।
जिल्ला प्रहरी कार्यालय रुकुमपश्चिमका प्रहरी नायब उपरीक्षक नवराज पोखरेलका अनुसार बुधबार बेलुका ६ः१५ बजे चौरजहारी बजारबाट वडा ८ तर्फ गइरहेको भे १ ह ५९९७ नम्वरको अटो वडा ३ को कार्यालयनजिक दुर्घटना भएको हो ।
दुर्घटनामा परेर चौरजहारी नगरपालिका –८ गोइरीजिउलाका २८ वर्षीय योगेश्वर पुन र सोही स्थानका १८ वर्षीय प्रकाश पुन घाइते हुनुभएको छ । घाइतेमध्ये योगेश्वरको अवस्था गम्भीर र प्रकाशको अवस्था सामान्य रहेको बताइएको छ । दुवै जना घाईतेलाई उपचारका लागि चौरजहारी अस्पतालमा लिइएको प्रहरीले जनाएको छ ।
अटो चौरजहारी नगरपालिका –८ का ३० वर्षीय लोकेन्द्र घर्तीले चलाएको बताइएको छ । चालकले मदिरा सेवन गरेर तिब्र गतिमा अटो चलाएकाले अनियन्त्रित भई दुर्घटना भएको स्थानीयले जनाएका छन् । अटोमा सवार चार जनामध्ये अन्य दुई जना भने सकुशल रहेका छन् । चालकलाई प्रहरीले नियन्त्रणमा लिएको जनाएको छ ।
