अर्जुन काफ्ले
स्याङ्जा, कात्तिक १५ गते । अर्जुनचौपारी गाउँपालिकाले पहाडे गाईपालन गर्ने कृषकलाई प्रोत्साहन स्वरुप मासिक एक हजार रुपियाँ उपलब्ध गराउने भएको छ ।
पहाडे गाईपालन एवं संरक्षण कार्यक्रम सञ्चालन गर्दै आर्थिक वर्ष २०८१÷०८२ को स्वीकृत वार्षिक कार्यक्रम अनुसार प्रोत्साहन रकम दिन लागेको हो ।
सांस्कृतिक एवं धार्मिक महत्व बोकेकोे राष्ट्रिय जनावर गाई पालन गर्नेको सङ्ख्या घटिरहँदा पालिकाले यो अभियान ल्याएको हो।
अर्जुनचौपारीको आर्थिक वर्ष २०८१÷०८२ को स्वीकृत वार्षिक कार्यक्रम अनुसार पहाडे गाईपालन एवं संरक्षण कार्यक्रम सञ्चालनका लागि इच्छुक गाईपालकका लागि पालिकाले आवेदन खुलाइएको हो ।
अर्जुन चौपारी गाउँपालिकाभित्रका बसोबास गर्ने इच्छुक गाईपालक किसानलाई लालपूर्जाको प्रतिलिपि÷जग्गा भाडामा लिएको भए कम्तीमा पाँच वर्षको लागि भाडामा लिएको सम्झौतापत्रको उपलब्ध गराउने माग गरिएको छ ।
यस्तै, गोठसहित गाई धनी देखिने गरी गाईको फोटो, दुई जना छिमेकीको सिफारिस, वडा कार्यालयको सिफारिससहित आवेदन पेश गर्न पालिकाले भनेको छ ।
पालिकाबाट छनौट भएका आवेदकलाई गाईपालन गर्ने समयसम्म एक गाई पाले वापत मासिक एक हजार रुपियाँ प्रोत्साहन रकम उपलब्ध गराउने गाउँपालिकाका प्रमुख प्रशासकीय अधिकृत कौशल पाण्डेले बताउनुभयो ।
गहुत, गोबरको महत्व रहेको पहाडे गाईको दुध पौष्टिक हुने भएकाले गाईको सरक्षणमा पालिका जुटेको गाउँपालिका अध्यक्ष प्रकाश तिवारीले बताउनुभयो ।
पशुपालन माध्यमबाट पालिकालाई आत्मनिर्भर गराउने उद्देश्य पालिकाको रहेको बताउँदै तिवारीले भैँसी किन्न नसक्ने विपन्नका लागि राम्रो हुने बताउनुभयो ।
गाईपालनको लागि अहिले घाँस प्रशस्त रहेको बताउँदै तिवारीले पालिकामै नवग्रह मन्दिर बन्दै गएकाले गाई पालनको महत्व अझै बढ्ने बताउनुभयो ।
गाउँमा एक दुई जनाले गाई पालेमा गहुत, गोबर, दुध तथा दान गर्ने प्रक्रियामा गाईलााई प्रयोग गरेर आय आर्जन गर्न सकिनेछ ।
भैँसी, बाख्रालगायतका पशु तथा कृषि क्षेत्रमा प्रतिशतको आधारमा दिने अनुदान प्रभावकारी नभएकाले पालिकाले गाईपालनमा याो विधि अपनाएको हो ।
-original-thumb.jpg)
