गोरखापत्र समाचारदाता
काठमाडौँ, कात्तिक १० गते । उद्योग, वाणिज्य तथा आपूर्तिमन्त्री दामोदर भण्डारीले चामल, तेल तथा दाललगायतका वस्तु उपभोक्तालाई सहज र सुलभ रूपमा उपलब्ध गराएर इमानदारीपूर्वक व्यवसाय गर्न सम्बद्ध व्यवसायीलाई आग्रह गर्नुभएको छ ।
नेपाल चामल तेल दाल उद्योग सङ्घका अध्यक्ष कुमुद दुगडलगायतको टोलीले कच्चा दाल, गेडागुडी आयातमा १० प्रतिशत र धान आयातमा २.५ प्रतिशत अग्रिम आयकर खारेजका सम्बन्धमा बुझाएको ध्यानाकर्षणपत्र बुझ्दै मन्त्री भण्डारीले विभिन्न अवस्था देखाएर महँगी नबढाउन आग्रह गर्नुभएको हो ।
मन्त्री भण्डारीले भन्नुभयो, “उद्योगी व्यवसायीलाई चिन्ने उद्योग मन्त्रालयले हो, उपभोक्ताको हितमा इमानदारपूर्वक व्यवसाय गरेमा उद्योगी व्यवसायीका मर्का यो मन्त्रालयले जुनसुकै हालतमा बुझ्छ, तपाईंहरूले यस अवधिमा उपभोक्ताको हितमा पनि ध्यान दिएर मुनाफा मात्रै नसोचिदिनूस् ।”
अन्तर्राष्ट्रिय मूल्यवृद्धि भयो भन्दै बजारमा खाने तेलको मूल्य बढाउने काम बेला बेलामा गरिने गरिएको भन्दै मन्त्री भण्डारी त्यसो नगर्न उद्योगीलाई आग्रह गर्नुभयो ।
सङ्घले भारतबाट नेपालमा धान आयात गर्दा कुनै कर नलाग्ने व्यवस्था उद्योगमन्त्रीबाट भएकामा उद्योगी व्यवसायीले सराहना व्यक्त गर्दै नेपालबाट बासमतीलगायत चामलको कोटा न्यूनतम निर्यात मूल्य निर्धारण गर्नुपर्ने जस्ता विभिन्न माग राखेको छ ।
चामलमा मूल्य घटाए जसरी दाल र तेलमा पनि मूल्य घटाउने प्रयास गर्न मन्त्री भण्डारीले आग्रह गर्दै आयकरलगायत करका दरमा हेरफेर गर्न अर्थमन्त्री स्वदेश फर्किएपछि सम्बन्धित उद्योगी व्यवसायीसँग आवश्यक छलफल गरेर समाधान गरिने बताउनुभयो ।
